Ikil u kaxta’al u beeta’al u suut taak’in tu kaajil Saki’, le 12 ti’ mayo máanika’, u jala’achil u lu’umil Yucatán, Mauricio Vila Dosal tu k’a’aytaj u beeta’al 17 u p’éel túumben suutmeyaj taak’in tumen mola’ayo’ob k’amik ajxíinximbal máako’ob, líik’sik kúuchilo’ob náaysaj óol yéetel kúuchilo’ob tu’ux ku yúuchul janal, te’e kaajo’ yéetel tu bak’pachil.
Jala’ach Vidal Dosale’ tu ya’alaj le taak’in kun beetbil u suut ti’al u yúuchul meyaj te’e kaaja’, yaan u máansik tak mil 467 miyoonesil pesos, yéetel yaan u yantal 4 mil 800 u p’éel kúuchil meyaj ti’al kajnáal yano’ob te’e baantaa’.
También te puede interesar: Anuncian 17 nuevas inversiones privadas para Valladolid
Beyxan Grupo Xcarete’ tu ka’a jets’aj u taakil u táakmuk’tik u suut taak’in yéetel u k’a’amal ajxíinximbal máako’ob te’e lu’uma’, ikil yaan u beetiko’ob u meyajil Xibalbá. Beey úuchik u k’a’ayta’al le miércoles máanika’, ti’ u k’áaxil tu’ux kun beetbil residencial Fincas Los Álamos, Saki’.
Beyxan tu ya’alaje’, u k’a’amal ajxíinximbal máako’obe’, noj páajtalil yaan ti’al u beeta’al u yantal meyaj ti’ kaaj kuxa’an ich óotsilil.
Beey túuno’, yéetel u yáantajil u máaxo’ob kun ts’áak taak’in ti’al meyaj, beyxan yéetel u meyajil jala’ache’, Yucatáne’ yaan u nojba’altal ti’ u meyajil k’am ajxíinximbal máako’ob ich lajun ja’abo’ob.
Ti’ Yucatán láaj yaan ba’ax k’a’abéet ti’ Quintana Roo
Tu súutukil úuchik u t’aan Miguel Quintana Pali, máax jo’olbesik Grupo Xcaret, tu ya’alaj jets’a’an u beeta’al u túumbel kúuchil ts’a’aban u k’aaba’ beey Xibalbá ti’ u lu’umil mayab, tumen te’e nojlu’uma’ yaan ba’ax mina’an Quintana Roo. Yaan kóolonial kaajo’ob, ts’ono’oto’ob, najil k’ujo’ob, ichil uláak’ ba’alo’ob.
Mauricio Vilae’ tu ya’alaje’ u mola’ayil Grupo ALVES yaan u beetik u suut 653 miyoonesil pesos ti’al u beeta’al jo’op’éel nojmeyajo’ob tu kaajil Saki’; le beetik yaan u yantal maanal ti’ 700 u p’eel meyaj ti’al kaajnáalo’ob. Beyxan mola’ay Cenote Mukul S.A.P.I de C.V, yaan u ts’áak meyaj 500 miyoonesil pesos yeetel yaan u beetik u yantal kex mil 780 u p’éel meyaj it’al máak.
Je’el bix le je’elo’obo’ yaan u yantal uláak’ mola’ayo’ob kéen u ts’áajo’ob taak’in ti’al u sutulsuut meyaj yéetel náajal, ichilo’obe’ ti’ yaan Fincas Los Álamos máax yaan u ts’áak 270 miyoonesil pesos, yéetel yaan u beetik u yantal 180 u p’éel meyajo’ob; yaan u beeta’al Hotel del Encomendero, ba’ale’ ti’al u beeta’ale’ yaan u k’a’abéetchajal 70 miyoonesil pesos yéetel u beeta’al u yantal kex 260 u p’éel meyajo’ob. Beyxan Grupo Inmobiliaria Codi del Sureste, yaan u líik’sik Hotel Country, le beetike’ yaan u k’u’ubul meyaj 40 miyoonesil pesos, ichil uláak’ ya’abach mola’ayo’ob.
Xak'alutskíinsa'an tumen: Sasil Sánchez Chan
