Ikil táan u náats’al u k’iinil u suut máak xooke’ ti’ u kúuchilo’obe’, Nayely Melina Reyes Mendoza, máax jo’olbesik Colegio de Licenciados en Educación de Yucatán, tu ya’alaje’ táan u láaj líik’sa’al ba’al ti’ u jets’a’al u nu’ukil u suut u ts’a’abal xook, ba’ale’ walkila’ táan u ts’áak u yóolo’ob ti’al u beetiko’ob u tsoolil meyaj tu’ux ku xa’ak’ta’al xook ku yantal en línea yéetel u bin máak najilxook ti’al beyo’ ma’ u jach táaj beeta’al u ka’anal ajka’ambesajo’ob.
“Xook je’el bix k k’ajóolmajil ka’ache’ ma’ táan u béeytal u ka’a úuchul beyo’”, tu ya’alaj Nayeli Melina Reyes.
También te puede interesar: La educación como la conocimos no podrá volver a ser: docente de Yucatán
Beyxan, tu tsikbaltaje’ máaxo’ob oka’ano’ob te’e múuch’kabila’ táakpajo’ob xan ti’ k’áatchi’tsikbal beeta’ab tumen Secretaría de Educación del Estado de Yucatán (Segey) ti’al u yojéelta’al bix yanik najilo’ob xook yéetel ba’ax unaj u beeta’al ti’al u kaláanta’al u toj óolal xoknáalo’ob yéetel ajka’ansajo’ob.
Le beetike’, ajka’ansajo’ob ku meyajo’ob ti’ puublikáa najilo’ob xooke’, ma’ jach sáasil yanik ti’ob ba’ax tsoolilo’ob jetsa’an unaj u beeta’al ti’al u kaláanta’al u toj óolalo’ob kéen yanak y suuto’ob meyaj te’e kúuchilo’obo’. Le beetik táan u k’áata’al ka jach jets’a’ak tu beel kéen k’a’abéetchajak.
A’alab xane’, ti’ u najilo’ob xook media superiore’, u ya’abil máaxo’ob jo’olbesike’ ts’o’ok u jets’iko’ob ka xa’ak’tak u suut meyaj máak, junjaatse’ ti’ Internet yéetel uláak’e’ ka xi’ik máak te’e kúuchilo’obo’, ti’al beyo’ u suut máak tsola’an yéetel jujump’íitil.
“Beey u tuukulil u suut máak xook, tumen beyo’ ma’ táan u seen múuch’ul xoknáalo’ob te’e najilo’ob xooko’, ts’o’okole’ unaj xan u tukulta’al bix kéen ch’a’anukta’ak u tsoolil kaambal ti’al ma’ beeta’al u seen ka’anal ajka’ansajo’ob, tumen wa ma’e’ ku chi’ichnaktalo’ob wa ku jach táaj ya’abtal ba’al u beeto’ob”, tu ya’alaj.
Yóok’lal túun le tuukulila’, tu ya’alaje’ yaan najilo’ob xook tu’ux ts’o’ok u káajal u beeta’al k’eexilo’ob ti’ u nu’ukbesajil kaambal ti’al u xa’ak’tal bix u yúuchul xook yéetel u ka’ap’éel bix u yúuchul meyaj walkila’.
Reyes Mendozae’ tu ya’alaje’, yaan ajka’ambesajo’obe’ ma’ táan u yóotiko’ob suut meyaj te’e najilo’ob xooko’, tumen ma’alob u yilko’ob u ts’áako’ob xook kex náach yanik máak, ba’ale’ yaan xan uláak’ junjaats ajka’ambesajo’obe’ táan u yaayantik u suuto’ob meyaj yéetel xoknáalo’ob, le beetike’, unaj u yoksikubáaj Segey ti’al u jets’ik ba’ax no’oja’an u beeta’al ti’al u yutsil kaambal paalalo’ob yéetel táankelemo’ob.
Xak'alutskíinsa'an tumen: Sasil Sánchez Chan
