Máax beetik u ministroil Estado de Derechos Humanos y Relaciones con el Parlamento, Mustafá Ramid, ts’o’ok u ya’alik Españae’ “u yojel jach ko’oj kéen u tojolt u p’atik tséelik u muuk’il Marruecos”, tumen le noj lu’umo’ ma’ táan beetik ba’ax jets’a’an ti’al “utsil biinsajbail” tumen ma’ táan u “wu’ulabtik” u séekretario jéeneralil Frente Polisario, Brahim Ghali.
“Ma’ táan u béeytal u éejenta’al, ba’ax táan u beetik España, tumen ma’ táan u ch’a’anuktik ba’ax jets’a’an ti’al u yantal utsil biinsajbail, ikil táan u tuus ti’al u ya’alik u jaajil u k’aaba’ máax k’uch te’elo’”, beey tu ts’íibtaj Ramid tu kúuchil Facebook.
También te puede interesar: España prefirió su “relación con el Polisario” que con Marruecos: Ramid
Ma’ xaan wa u kóojol Brahim Ghali tu lu’umil Españae’ leti’ beet u káajal u seen k’uchul táanxel kaajil máako’ob tu noj kaajil Ceuta, tumen marrouquíil jala’ache’ tu ya’alaj, walkil jump’éel p’iis k’iinil paachile’, u k’a’amal bin Ghali tu lu’umil Españae’ je’el u beetik u yúuchul wa ba’axe’.
“Ba’ax táan ka’ach u páa’ta’al ti’ Marruecos yóok’lal España, ikil tu yéeyaj juntúul máax jo’olbesik u múuch’il máako’ob tu ch’a’ajo’ob u ts’oon tu táan”, beey tu k’áatchi’ibtaj miniistro marroquíil, úuchik u ya’alik xane’ “ba’ax je’el ka’ach u tsela’al ti’ España wa ka u k’áatchi’ibt ka’ach Marruecos yóok’lal ba’ax ku tukultik kéen u wu’ulabt le máaka’”, ts’o’okole’ “ba’axten Españae’ ma’ tu k’a’aytaj u kóojol España le máaka’ yéetel u jaajil u k’aaba’”.
Ts’o’okole’, tu ya’alaje’ ma’ bin a’ala’ab ti’ u Jala’achil Marruecos úuchik u k’uchul Ghalii’, le beetik “sáasil yanik u tuukul España tumen ma’ tu beetaj ba’ax jeets’el ti’al utsil biinsajbáajili’”. “Kux túun wáaj Marruecos máax beetik ba’ax ma’ paatali’”, tu ya’alaj.
Ramide’ tu yaj óoltaj úuchik “u yóotik” España u táanilkuns “bix u biinsikubáaj Polisario yéetel u mentoril, Argelia”, tumen je’el bix tu ya’alaj ministroe’, “ts’o’ok u jach táaj p’atik paachil ba’ax jets’a’an ka’achij”, le beetik “unaj u jach ts’aatáanta’al ba’ax ku yúuchul”.
Beey túuno’ Ramide’ ku ya’alik Marruecose’ jach tu “beel yaanik” ti’al u ts’áak u yojéelt España beyka’aj “u nojochil le yaj óol táan u yantal tu k’aaba’ le utsil biinsajila’” ts’o’okole’, ma’ bin táan u éejentik ka “tu’ubsa’ak beyka’aj u muuk’ yaan”, ti’al beyo’ u “xak’altik bix yanik almejenil a’almajt’aan yéetel bix unaj u biinsikubáaj yéetel lu’umo’ob yanik tséel ti’, ti’al u chíimpoltik u páajtalilo’ob”.
Xak'alutskíinsa'an tumen: Sasil Sánchez Chan
