Máax beetik u ajbáaxal kuchnáal ti’al u jo’olpóopil u kaajil Jo’, ti’ u almejenil múuch’kab Partido Acción Nacional (PAN), Renán Barrera Concha, táanilchaja’an ichil máax ti’ tukulta’an u ts’a’abal yéeyajil tumen kaaj: 33 por siientoil ti’ kajnáalo’obe’ tu ya’alajo’ob je’el u ts’áak u yéeyajil ti’; 20.6 siientoile’ ti’al Jorge Carlos Ramírez Marín, máax ku báaxal ich Partido Revolucionario Institucional (PRI) nup’a’an xan yéetel Partido de la Revolución Democrática (PRD), yéetel u 14.9 por siientoile’ ti’al Verónica Camino Farjat, u x báaxalil Movimiento Regeneración Nacional (Morena), Partido del Trabajo (PT), yéetel Partido Verde Ecologista de México (PVEM).
Le óoxtúul aj báaxal kuucho’oba’ ku much’iko’ob u 68.5 por siientoil yéeyaj unaj u yantal; ka’alikil u 18.1 por siientoilo’, ma’ jets’a’an máax ti’ kun ts’áabili’, beey úuchik u chíikpajal ti’ k’áatchi’-xook beeta’ab tumen Poll Position úuchik u k’ubéenta’al ti’ tumen La Jornada Maya, ichil 22 tak 24 ti’ mayo máanika’.
También te puede interesar: Aventaja Renán Barrera en intención del voto
K’áatchi’-xooke’ beeta’ab ti’ 400 u túul máak, máax ti’ob ts’o’ok 18 u ja’abil yéetel kaja’ano'ob Jo’.
Ichil máax jach k’ajóolta’an tumen kaaje’, a'alabe’ u 99 por siientoil u k’ajóol máax Barrera Concha; 94.8 por siientoile’ tu ya’alaj u yojel máax Ramírez Marín, 58.1 por siientoile’ máax Camino Farjat, yéetel 46.7 por siientoe’ máax Víctor Cervera Hernández.
Ka’aj k’áatchibta’ab: Ba’ax ka tukultik yóok’lal… u t’aanil “utse’” yéeya’ab tumen 41.7 por siientoil tu fáavor Renán Barrera, ka’alikil 24.3e’ yéeya’ab ti’al Carlos Marín, yéetel u nuebéeil por siientoile’ ti’al Verónica Camino. Cervera Hernández jp’áat yéetel 5.4 por siientoil.
Ka’anal úuchik u chíikpajal u xookil máax chíimpoltik meyaj ku beeta’al tumen u yóox jaats meyajil jala’ach: 70 por siientoe’ tu chíimpoltaj u meyaj u jala’achil u lu’umil Yucatán, Mauricio Vila Dosal; 51.6 por siientoe’ ti’al u jala’achil México, Andrés Manuel López Obrador, yéetel 46.5 por siientoe’ ti’al Renán Barrera.
Xak'alutskíinsa'an tumen: Sasil Sánchez Chan
