U féeminista múuch’kabil Siempre Unidas táan u meyaj ti’ jejeláas kaajo’ob ti’ u péetlu’umil Quintana Roo, ti’al u chíimpoltik ko’olel kíinsa’ano’ob te’elo’ yéetel ti’al ma’ u tu’ubsa’alo’obi’. Leti’obe’ ku bonik pak’o’ob, u ts’ooke’ ti’ tu beetajo’ob Playa del Carmen.
Tania Ramírez, máax táaka’an ichil Siempre Unidas, tu tsikbaltaj jayp’éel ba’alo’ob yóok’lal boonil beeta’ab ti’al u chíimpolta’al Erika Sánchez Basaldúa, juntúul xlo’obayen ko’olel ku meyaj ka’ach ti’ jump’éel otel, máax kíinsa’ab tu winalil junio ti’ u ja’abil 2019, tu nojkaajil Playa del Carmen.
También te puede interesar: Crean murales para honrar a víctimas de feminicidio en QRoo
“Ts’o’ok ka’ap’éel ja’ab káajak k láak’intik u baatsil ko’olelo’ob ku kíinsa’al. K ti’ale’ k’a’anan u kaxta’al bix je’el u yutskíinsa’al jump’íit le loobilaj beeta’abo’, tumen leti’e’ máaxo’ob ku chi’ichnaktalo’ob kéen u yilo’ob ma’ táan u sáasilchajal ba’ax úuchij, tumen jo’olpóopo’obe’ mix ba’al ku beetiko’ob ti’al u kaxta’al máax kíinsej”, tu tsikbaltaj Tania Ramírez, tu súutukil úuchik u ya’alik xan le boonil beeta’ab te’e pak’o’, ku chíikbesik Erika, tumen ma’ táan u tu’ubul, ts’o’okole’ láayli’ u k’áata’al ka ts’a’abak u si’ipil máax beetej.
Tu ya’alaj xane’ baatsilo’obe’ ku yáantajo’ob xan ti’al u beeta’al le boono’obo’, Úuchik u beeta’al ti’al Erikae’, táakpaj u taata, yuum Saúl. Kéen beeta’ak jump’éel túumben boonile’ ku k’áata’al ti’ le láak’tsilo’obo’ máakalmáak oochel u k’áato’ob ka ts’a’abak ti’ jump’éel u pak’il le noj kaajo’.
Tak walkila’, ts’o’ok óoxp’éel pak’il boon beeta’an; le yáaxo’ beeta’ab ti’al u chíimpolta’al Victoria Salazar, juntúul salvadoril ko’olel kíinsa’ab tumen Policía Municipal, ti’ u kaajil Tulum, tu taal u ts’o’okbal u winalil marzo. Uláak’ jump’éele’ ti’al Karla Moguel, juntúul taxista kíinsa’ab Holbox, jach naats’ k’iin úuchik le yáaxako’.
Tania Ramírez tu ya’alaje’ te’e meyaj ku beetiko’obo’ ku bo’onol loolo’ob yéetel kibo’ob, tumen óoli’ beey jump’éel áaltar le ku yóotal e’esbilo’. “Meyaj ku beeta’al yéetel baatsilo’obe’, ku kaxtik u chíikbesik u kuxtal, u k’a’ajesajil yéetel u k’aaba’ ko’olel mina’anob bejla’e’”, tu tsikbaltaj.
Yóok’lal láak’inaj ku beeta’al te’e múuch’kabila’, ts’o’ok u béeykunsa’al, kex jun chan p’íite’, ka ts’a’abak u si’ipil le máak tu kíinsaj Kimberly, máax kíinsa’ab tu winalil mayo ti’ u ja’abil 2019.
Xak'alutskíinsa'an tumen: Sasil Sánchez Chan
