U éejidatarioilo'ob yéetel u kajnáalilo'ob Don Samuel, División del Norte, Haro, Escárcega y Miguel Alemán, Miguel Colorado, ichil uláak' kaajo'obe' tu takpoltajo'obe' láayli' u yoksa'al sajakil ti'ob tumen u mola'ayil Barrientos y Asociados, S.A. de C.V., ik'il t'ana'an meyaj ti'al u kaxtik ka tsikbaltpajak bo'ol unaj u beeta'al yóok'lal u páajtal u yúuchul meyaj te'e' k'áax tu'ux kun máan u beel Tren Maya.
Ti' k'a'aytajil tsikbal beeta'ab ti' Internet le 2 ti' junio máana', éejidatario'obe' tu k'áatajo'ob ka ustil bo'ota'ak ti'ob le bajux ku tojoltik u k'áaxo'ob, ts'o'okole' tu k'áatajo'ob xan ka yanak u yoksikubáaj u jala'achil y lu'umil México, Andrés Manuel Lopez Obrador, ti'al ka ts'o'okok tu beel le ba'ax ku yúuchula'.
También te puede interesar: Continúan agresiones a comunidades por Tren Maya: ejidatarios de Campeche
“To'one' t áantaj leti' ti'al u k'uchul u beetik u jala'achil, beoraa' to'one' táan k k'áatik ka jach ila'ak ba'ax táan u beeta'al tumen le mola'aya', tumen u k'áat u máamach’ jaantiko’on”, beey tu ya'alaj Delfino Gallegos, máax jo'olbesik u múuch'il Consejo de Vigilancia ti' u éejidoil División del Norte.
Kex beyo', tu ya'alajo'obe' le je'ela' ma' u k'áat u ya'al wa ma' táan u éejentiko'ob le noj meyajo', tumen ku tukultiko'obe' yaan u yantal uts u tia'alo'ob, ba'ale' tu ya'alajo'obe' u káato'ob ka bo'ota'ak u k'áaxo'ob je'el bix unaje'.
Je'el bix t ts'áaj k'ajóoltbile', walkil jump'éel winal paachile', u éejidatarioilo'ob Kaanpeche' tu ts'áajo'ob k'ajóoltbil u jejeláasil tuusilo'ob yéetel oksaj sajakil yanchaji, je'el bix xan bix úuchik u pe'ech'el u páajtalilo'ob beey wíiniko'ob tumen le mola’ayil je’elo’, úuchak u t’a’anal meyaj tumen Fondo Nacional de Fomento al Turismo (Fonatur) ti’al u páajtal u láaj p’a’atal ba’al tu beel ti’al u yúuchul u meyajilo’ob Tren Maya.
Éejidatario’obe’ tu ya’alajo’obe’, jach táaj ya’abach ba’al beeta’ab ma’ patali’; tu táan kaaje’ jts’a’ab k’ajóoltbil juntúul máak, a’alabe’ leti’e’ máax kéen u chíikbesik u mola’ayil Barrientos y Asociados de legal. Leti’e’ juntúul uts óol máak yéetel ku yáantik máak te’e éejidoo’ ti’al beyo’ ma’ u yantal mix ba’al tukultbil jela’an tu yóok’lal, ts’o’okole’ tu ya’alaje’ leti’e’ k’uch te’e kaajo’ ti’al u tsikbaltik yéetelo’ob bix kéen p’áatak u bo’olil kun ts’áabil ti’ob yóok’lal le k’áax tu’ux kun máan Tren Maya; tu jóok’saj ju’uno’ob ti’ jayp’éel éejido’ob, kex tumen ma’ tu chúukbesaj u mokts’íibil Asamblea, yéetel kex ma’ xan táakpaj mix jump’éel jo’olpóop ti’ u mola’ayil k’áaxo’ob; ts’o’okole’, ti’ éejidatario’obe’ ma’ u k’ub mix u yoochel le ju’uno’.
Xak'alutskíinsa'an tumen: Sasil Sánchez Chan
