Ti’ u ts’ook xookil yéeyajo’ob beetchaj ti’ yéeytambal ti’al u jóok’sa’al máax kéen u beet u jala’achil u lu’umil Kaanpeche’, xoka’ab 132 mil 588 u p’éelel tumen Consejo General del Instituto Electoral del Estado de Campeche (IEEC). Walkila’, ts’o’ok u k’ubik u chíimpolju’unil tu’ux jets’a’an u ya’abil yéeyajo’ob yanchaj, ti’ Layda Sansores San Román, máax táaka’an ich Movimiento Regeneración Nacional (Morena), tumen yéetele’ ku chíimpota’al beey leti’ máax náajalt le keetilo’, ba’ale’ u múuch’kabil Va por Campeche, tu’ux táakpaj jbáaxal kuchnáal Eliseo Fernández, tu k’a’aytaje’ yaan u ketiko’ob tu táan tribunaalo’ob le ba’ax táan u bin u jéets’ela’.
También te puede interesar: Confirma IEEC el triunfo de Morena en Campeche
Beey túuno’, u k’u’ubul le ju’una’, u ka’ap’éel xáak’abil táan u yantal ti’al u p’áatal Sansores San Román, beey u yáax ko’olelil kéen u beet u jala’achil te’e péetlu’umo’.
U ts’o’okol u xoka’al yéeyajo’obe’, ts’o’okspaj le sábado máanika’, beey úuchik u ts’a’abal k’ajóoltbil tumen IEEC. Tu taal u ye’esamenta’al le k’iin je’elo’, leti’ xan ka’aj ts’a’ab ojéeltbil u beeta’al sesiion éextraordinaaria, yaan u xookolil 34, ka’alikil táan u máan u k’iinilo’ob yéeyajil jets’a’an meyaj ti’al walkila’, tumen ma’ a’alak wa ts’o’oki’, ikil ma’ xan ts’o’okok meyajo’ob unaj u beeta’al tu paach yéeytambal. Le je’ela’ a’ala’ab tumen chéen uno por siiento u jela’anil yanchaj ichil u yéeyajilo’ob yanchaj te’e xóoxot’ lu’umil yéeyaj.
Tu ja’atskab k’iinil domingoe’, Sansores San Románe’ tu láak’intaj Pablo Gutiérrez Lazarus, máax tu k’amaj u chíimpolju’unil jets’ik beey jo’olpóop yéeya’an tu kaajil Carmen; le beetike’ beeta’ab xíimbal k’aaba’inta’ab beey Caravana de la Victoria, tu’ux k’iimbesa’ab u náajal Morena ti’ jejeláas méek’tankaajo’ob.
Ka’aj ts’o’ok u k’u’ubul ju’un ti’ Sansores San Románe’, séeba’an úuchik u jáanjan jóok’ol ti’al u ki’imak óoltik yéetel máaxo’ob táakmuk’tik, ka’alikil páa’ta’ab tu kúuchil Consejo General ti’ u mola’ayil IEEC, kex jach táaj k’a’amkach ja’ k’áaxi’.
U almejen múuch’kabil Movimiento Ciudadano tu k’amaj, tu ts’ooke’, 133 mil 899 u p’éel yéeyajo’ob, ba’ale’ ikil núup’ Morena yéetel Partido del Trabajo (PT) chéen ti’al u táakbesa’al u aj báaxal kuuch ti’al u beetik u jala’achile’, yanchaj uláak’ 5 mil 683 u p’éel yéeyajo’ob, ti’al beyo’ u yantal tu ts’ooke’ 138 mil 231 u p’éelal, yéetel le náajalnaj Sansores San Román.
Le beetike’, Eliseo Fernández, máax suuka’an u k’a’abéetkunsik reedes sosiiales, je’el bix Facebooke’, tu k’a’aytaj yaan u kaxtik bix u ketik yéeytambal úuchij, beyxan yaan u k’a’abéetkunsik u páajtalilo’ob yaan ti’al u ye’esike’ leti’ máax náajalt le yéeytambalo’, ts’o’okole’, tu jets’aj yaan u chíibesik tuusil tu beetaj Morena ti’al u máan táanil.
Xak'alutskíinsa'an tumen: Sasil Sánchez Chan
