de

del

Yanchaj xíimbalil líik’saj t’aan úuchik u kíinsa’al Yuridiana

Marchan en Bacalar por el feminicidio de Yuridiana
Foto: Marea Verde QRoo

Tu k’iinil jo’oljeake’, u jejeláasil máako’ob, ichil láak’o’ob, kajnáalo’ob yéetel áaktibiistaobe’, jóok’ u líik’es u t’aano’ob; ti’al u chíikbesiko’obe’ tu beetajo’ob jayp’éel boonilo’ob tu kúuchil Fiscalía General del Estado beyxan tu Ayuntamientoil Bacalar, tumen jach táaj péeka’an u yóolo’ob úuchik u yáax kíinsa’al juntúul ko’olel te’e méek’tankaajo’. Jayp’éel k’iino’ob paachile’, k’a’ayta’ab j sa’at Yuridiana, chéen ba’axe’ ma’ xáanchaj ka’aj kaxta’ab kimen tu jáal bejil ku bin tak Felipe Carrillo Puerto.

Páayt’aane’ beeta’ab tumen u múuch’kabil Marea Verde, ti’al u káajsiko’ob líik’saj t’aan yáax je’el tu páalasioil le kaajo’, ti’al beyo’ u bino’ob tak tu kúuchil Fiscalía General del Estado. Te’e ka’ap’éel tu’ux máano’obo’, tu beetajo’ob boonil yéetel tu p’atajo’ob k’uben t’aano’ob ti’al u k’áatiko’ob ka xu’ulsa’ak u loobilta’al ko’olel.  

 

También te puede interesar: Marchan en Bacalar por el feminicidio de Yuridiana

 

Le sábado máanika’, k’áata’ab áantaj, ti’ reedes sosiialese’, ti’al u kaxta’al Yuridiana Cruz Cima, máax k’ajóolta’an ka’ach beey Francis. Leti’e’ ts’o’ok ila’ab le jueves máaniko’, úuchik u jóok’ol tu meyaj, ba’ale’ láak’inta’an tumen juntúul xiib.  

Beey túuno’, úuchik u kaxta’al u wíinkilal juntúul kimen ko’olele’, le domingo máaniko’, Fiscalía General del Estadoe’ tu ts’áaj k’ajóoltbil xan ti’ reedes sosiaalese’, tu káajsaj u much’ik chíikulal ku bin u jóok’ol ikil u xak’alta’al bix úuchik u kíinsa’al juntúul ko’olel. Wíinkilale’ ti’ kaxta’ab tu kilómetroil 35+300, ti’ u bejil Bacalar-Felipe Carrillo Puerto. 

 “Chika’an yaan tu’ux loobilta’abij, Ma’ yo’omchaja’ani’. Aj xak’al máako’obe’ táan u beetiko’ob meyajo’ob yéetel táan u much’iko’ob ba’al ti’al u yojéeltiko’ob máax wa máaxo’ob táakpaj ti’ le si’ipil ba’ala’”, a’ala’ab tumen Fiscalía.

Beyxan k’áata’ab “ka yanak u yuumil máax meyajtik yéetel ojéeltik jach ba’ax le k’a’abéet u beetchajal kéen loobilta’ak ko’olel, je’el bix le ts’o’ok u yúuchula’, tu’ux xan ka chíimpolta’ak u páajtalil máak, ti’al ma’ u ts’a’abal k’aasil kuuch ko’olelo’ob kaxtik ka je’ets’ek u si’ipil máax beet le loobilajo’”.  

Ichil xookil beeta’ab tumen u múuch’kabil Siempre Unidas, úuchik u kíinsa’al le ko’olela’, ku náakal 18 chéen ti’ le ja’aba’, le beetike’ jach táaj táan u k’áata’al ka je’ets’ek u aalil a’almajt’aan yóok’ol máax beetej, ba’ale’ beyxan ka kaláanta’ak ko’olel je’el bix unaje’.  


Xak'alutskíinsa'an tumen: Sasil Sánchez Chan