U jo’olpóopil u noj kaajil Jo’, Alejandro Ruz Castro, tu k’a’aytaj tak walkila’, tuláakal le meyajo’ob táan u beeta’al ti’al u yutskíinsa’al Paso Deprimido jach u ch’a’amaj bej, kex tumen ma’ ch’éenek u k’áaxal ja’ ti’ le ts’ook k’iino’oba’, le beetike’, wa tumen beey kéen úuchuk meyajo’, ku tukulta’al yaan u lája ts’o’okol ti’al u chúumukil julio.
Ti’ k’áatchi’tsikbal beeta’abe’, Ruz Castro tu tsikbaltaj walkila’, u yáamil lu’ume’ ma’ ka’achajaki’, le beetik ts’o’ok u béeytal u yutsil meyajta’al ba’al te’elo’.
“Éem le beyka’aj ka’anal yanik le ja’ ka’ach tu yóok’olal ja’ seen k’áax tu ja’abil 2020, ba’ale’ walkila’ ma’ jach táaj ka’anchajaki’, le beetike’ ts’o’ok u béeytal u beeta’al u meyaj utskíinajil te’e Paso Deprimidoo’ yéetel ma’ xo’ot’ok u beeta’ali’”, tu ya’alaj.
También te puede interesar: Mérida prevé que el Paso Deprimido esté listo a mediados de julio
Beey túuno’, ti’al u beeta’al meyajo’obe’ ts’o’ok u yáax k’a’abéetkunsa’al 12 miyoonesil pesos, yéetel ma’ tukulta’an u xu’upul maanal ti’ 30 miyonesil ti’al u yutskíinsa’al.
“Je’el bix ku bin u beeta’al meyajo’ob tumen mola’ay k’ubéenta’an ti’ ka u beete’, beeyxan u bin k jach k-ilik wa uts beeta’anil ti’al beyo’ u páajtla k bo’otik je’el bix jets’a’anil. Táan tukultik ti’al u chúumukil julio kéen láaj ts’o’okok”, tu ya’alaj.
Ruz Castro tu ya’alaj aj meyajo’obe’ ma’ je’elel mix junsúutuk, bulk’iin u yúuchul meyaj sáansamal.
“Ts’o’ok u koláarta’al u pak’il le jool táan u mu’uk’ankúunsa’alo’. Jo’oljeak k’uch u bolonp’éel ooyail semeentóo, ts’o’okole’ táan k múul meyaj yéetel kúuchilo’ob xaak’al, ti’al u kaláanta’al ka beeta’ak tuláakal ba’ax je’el bix yáax tukulta’ano’”, tu tsikbaltal.
Meyajo’obe’ káaj u beeta’al tu jo’oloj jump’éel k’iin ts’o’okok u beeta’al xaak’al ti’al u yila’al ba’ax ku yúuchul yéetel Paso Deprimido, tumen tu ja’abil 2012 ka’aj kája u chíikbesik ma’ jach patali’, le beetike’, ts’o’ok u yantal u k’a’abéetkunsa’al 79.4 miyoonesil pesos ti’al u kaláanta’al yéetel u yutskíinsa’al tumen u Ayuntamientoil u kaajil Jo’.
Ichil jayp’éel ba’al j ts’a’ab k’ajóoltbil tumen u Ayuntamientoil u kaajil Jo’, ti’al u yutskíinsa’ale’, táan u meyaj kex 60 máako’ob. Tak walkil xana’, táan u binetik u ts’a’abal jayp’éel duukto’ob ti’al u ts’a’abal u beel ja’ unaj u yéemel tak tu yáamil lu’um, tumen táan u tukulta’ale’ ma’ táan u xóot’ol meyaj tak kéen ts’o’okok.
Xak'alutskíinsa'an tumen: Sasil Sánchez Chan
