U jala’achil u lu’umil Quintana Roo, Carlos Joaquín Gonzáleze’, tu k’a’aytaje’, tu ts’ook p’isk’iinil junioe’ leti’ kéen káajak u ts’a’abal u báakunail Covid-19 ti’ kajnáalo’ob yaan u ja’abil ichil 30 tak 39, tu kaajilo’ob Benito Juárez yéetel Othón P. Blanco, beyxan ti’al u ts’o’okbal julioe’ yaan u ts’a’abal ti’ maáx yaan u ja’abil ichil 18 tak 29. Le beetike’, tséel p’áatik u tuukulil u ts’a’abal báakuna ti’ máaxo’ob ku meyajo’ob ti’al u k’amiko’ob aj xíinximbal máako’ob, tumen úuchik xan u yojéelta’al táan u káajal u sutulsuut uláak’ ka’ap’éel u túumben jejeláasil le pak’be’en k’oja’anila’, jala’ache’ tu ya’alaj táan u mu’uk’ankúunsa’al meyaj ku beeta’al ti’al u kaláanta’al kaaj.
También te puede interesar: Descarta CJ vacunación al personal del sector turístico de QRoo
Carlos Joaquín tu ya’alaje’, ichil ba’ax táan u yila’al ti’ le máax táan u tsa’ayal pak’be’en k’oja’ane’, chíikpaje’ leti’e’ máaxo’ob yaan u ja’abil ichil 20 tak 40, ts’o’okole’ u ya’abil ti’ le je’elo’obo’ ku beetik meyajo’ob yaan u yil yéetel u k’a’amal aj xíinximbal máako’ob.
Beyxan tu tsikbaltaje’, u jala’achil u lu’umil México, Andrés Manuel López Obrador, je’el bix xan u mola’ayil Secretaría de Salud Federal, ts’o’ok u jets’iko’ob ma’ táan u ts’a’abal báakuna ti’ u aj meyajilo’ob k’amik xíinximbalo’.
“Tu ts’ook p’isk’iinil junioe’ yaan u káajal k ts’áak u báakunail máax yaan u ja’abil ichil 30 tak 39, tu kaajil Benito Juárez beyxan Othón P. Blanco, ts’o’okole’ le je’ela’ ku núup’ul ti’ u ts’ook u k’iinil xan u ts’a’abal u yáax jaatsil báakuna ti’ máax yaan u ja’abil ichil 40 tak 49, ti’al u taal u ts’o’okol yéetel máaxo’ob yaan ichil 60 tak 69, je’el bix xan u ts’a’abal u ka’a jaatsil ts’aak máaxo’ob yaan u ja’abil ichil 30 tak 39, ti’al beyo’ kéen láaj ts’o’okoke’, tu jo’oloj ka’ap’éel wa óoxp’éel p’isk’iinile’, u páajtal u káajal u ts’a’abal ti’ máax yaan u ja’abil ichil 18 tak 29, le beetik ma’ táan u yáax ts’a’abal ti’ máaaxo’ob ku meyaj ti’al u k’a’amal aj xíinximbalo’obi’”, tu ya’alaj.
Jala’ache’ tu ya’alaj ts’o’ok u chan máan k’iin úuchik u yojéelta’al yaan ti’ le lu’umo’, u jejeláasil Covid-19, ba’ale’ le je’elo’ túumben úuchik u je’ets’el tumen Instituto de Diagnóstico y Referencia Epidemiológica ti’ u lu’umil Yucatán úuchik u sáasilkunsike, k’ucha’an brasileñail yéetel californianail jejeláasil.
Xak'alutskíinsa'an tumen: Sasil Sánchez Chan
