de

del

Féeministaobe’ tu beetajo’ob takpool úuchik u túumben jets’a’al máax kun jo’olbesik Semujeres

Feministas interponen amparo contra el nombramiento de titular de Semujeres
Foto: Itzel Chan

Féeministaa ko’olel, tu’ux táaka’an x xak’al xooko’ob, áaktibiistaob yéetel máaxo’ob táaka’an ich múuch’kabilo’obe’, tu takpoltajo’ob yanchaj mola’ay loobilajil, úuchik u je’ets’el u p’áatal meyaj María Cristina Castillo beey u x jo’olbesajil u mola’ayil Secretaría de las Mujeres (Semujeres), tumen ku ya’aliko’obe’ ma’ chuka’an u paakati’ ti’al u ts’aatáantik ba’ax jets’a’an ti’ a’almajt’aan ba’ale’ tu’ux ka u yáax tukult u kéet kuxtalil xiib yéetel ko’olel, le beetike’, tu leti’obe’ tu ts’áajo’ob jump’éel áamaparo tu táan Poder Judicial de la Federación.

Máaxo’ob táaka’an ichil Frente por los Derechos de las Mujeres, tu ya’alajo’obe’ k’a’abéetchaj u beetiko’ob le takpoola’ ti’al u yu’uba’al u t’aano’ob. X xaak’al xook Gina Villagómez Valdés tu ya’alaje’, ti’ áamparo j ts’áabe’ ku takpolta’al u loobilajil mola’ay. “Le ba’ax k beetika’ ku ts’áakton u páajtalil beey kajnáalo’on ti’al k líik’sik k t’aan tu yóok’lal ba’ax kúulpach u beeta’al ti’ a’almajt’aan”, tu ya’alaj. 

 

También te puede interesar: Feministas interponen amparo contra el nombramiento de titular de Semujeres

 

“Unaj u yantal juntúul wa máax u yojel ba’ax ku beetik, u yojel ya’abach ba’al tu yóok’lal ba’ax kéen u meyajtej yéetel u yojel bix u yúuchul le loobilaj ku máansik ko’olel sáansamal, tumen je’el bix táan u yúuchul walkila’, u kuxtal ya’abach ko’olel p’aatal chúumuk, yaan ku kíinsa’ali’ yéetel yaan ku loobilta’al ichil u yoto’ochi’. Láayli’ xan k loobilta’al yéetel u péech’óolal mola’ayo’ob chéen beey u jáanjan t’aano’ob. Jach yaan tu’ux k náajaltik le áamparo ts’o’ok k ts’áaka’”, tu ya’alaj.  

Beyxan, x áaktibista Nancy Walkere’ tu ya’alaje’ ts’o’ok u k’áatiko’ob ka béeyak u much’ikubáajo’ob yéetel u jala’achil u lu’umil Yucatán, ti’al u tsola’al ti’ ba’axten táan u k’áatiko’ob ka yanak juntúul máax no’ojan meyaj tu táan Semujeres. Tu ya’alaje’, te’e péetlu’umila’ yaan máako’ob no’ojano’ob ti’al u beetik le meyaja’, ts’o’okole’, kex ma’ táan u p’íitkunsik ba’ax beeta’an tumen María Cristina Castillo tak walkila’, leti’e’ chéen u k’áat u chíikbesubáaj ichil poliitikáa, ba’ale’ ma’ táan u náachtal u paakat ti’ ba’ax k’a’abéet ti’al ko’olel. 

Xak'alutskíinsa'an tumen: Sasil Sánchez Chan