Úuchik u beeta’al tuáakal u t’aanil yéetel u máanil ti’al u láaj p’ata’al ba’al tu beele’, ajka’ansajo’ob ti’ u kaajil Felipe Carrillo Puertoe’ tu béeykunsajo’ob ka éejenta’ak u yantal jump’éel u noj najil xook bienestar Benito Juárez te’e kaajil je’elo’. Le najil xooka’ táakbesa’an ichil nu’ukbesaj ku taal u beeta’al tumen U Jala’achil u lu’umil México tu’ux ku je’ets’el najilo’ob xook ti’ kaajo’ob tu’ux mina’an, ti’al beyo’ u yantal tu’ux u yúuchul kaambal.
X ka’ansaj Maritza Yeh Chan, máax jo’olbesik u meyajil le najil xooka’ tu ya’alaj “yaan aj ka’ansajo’one’ wey siijilo’ob ti’ maaya lu’um, ts’o’okole’ to’on beet u máanil ti’al u yantal le najil xooka’, t’aanajo’on yéetel máax jo’olbesik le nu’ukbesajo’, t ts’áaj k’ajóoltbil meyaj tak tukultaje’, tak ka’aj éejenta’abij”.
También te puede interesar: Invitan a inscribirse a la carrera de educación bilingüe en FCP
Beyxan, náats’o’ob yiknal u jo’olpóopilo’ob Felipe Carrillo Puerto ti’al xan u ts’a’abal ti’ob junxóot’ k’áax ti’al u yantal tu’ux u beeta’al le najil xooko’. Le je’el xa’ano’, béeychajij.
U yáax ja’abil xooke’ yaan u káajal agosto yéetle táan u páa’tal ka yanak ichil 100 yéetel 150 u túul xoknáalo’ob.
Tak walkila’ chéen jump’éel nu’ukbesajil xook yaan u ts’a’abali’, leti’ bix u yúuchul ka’ansaj ich ka’ap’éel t’aan (maaya-káastelan) yéetel máax kéen u ts’o’oks le xookila’, yaan u páajtal u ka’ansaj ti’ preescolar, primaria yéetel secundaria.
Yeh Chane’ tu ts’áaj k’ajóoltbile’, x ma’ bo’olil u ts’íibtik máak u k’aaba’i, ts’o’okole’ ti’ xoknáalo’obe’ yaan u ts’a’abal lalaj winale’ dos mil 300 pesos ti’al u yáanta’alo’ob.
Máax u k’áat u beet le xokila’, yaan u yantal u k’ubik u ju’uno’ob Casa de la Cultura tu méek’tankaajil Felipe Carrillo Puerto. Jach u xanile’ unaj u biinsa’al tak 30 ti’ junio. Beyxan ku páajtal u t’aan máak te’ela’: 9831853051 wa u túuxta’al ts’íib ti’ u kúuchil Facebook Doncella Maya.
Xak'alutskíinsa'an tumen: Sasil Sánchez Chan
