de

del

Ts’o’ok u ma’anal u 84 por siientoil óonkolojiiko ts’aak k’a’abéet: AMLO

Ya fue adquirido 84 por ciento de los medicamentos infantiles: AMLO
Foto: Presidencia

Kex tumen jach táaj talam u páajtal u yantale’, u jala’achil u noj lu’umil Méxicoe’ tso’ok u maniik 21 ti’ le 25 u p’éel óonkolojiiko ts’aak k’a’abéet, beey úuchilk u ya’alik jala’ach Andrés Manuel López Obrador.

Ti’ u láak’il máaxo’ob tsaayal ts’unus, wa kaansere’, jala’ache’ tu ya’alaj sáansamal bix u ts’áak u yuumil u máan u kaxt le ts’aako’obo’, ba’ale’ tu chíimpoltaj xan páajtalil yaan ti’ob ti’al u jach k’áatiko’ob yéetel u líik’sik u t’aano’ob wa ma’ táan u ts’a’abal ti’obi’. 

 

También te puede interesar:  Tribunal ordena al gobierno garantizar abasto de medicinas oncológicas

 

Máax beetik u subsekretaryoil Prevención y Promoción de la Salud, Hugo López-Gatell, tu ya’alaje’, yanili’ u páajtalil, ti’ u yuumil paalalo’ob tsaayal ti’ob ts’unuse’, u líik’sik u t’aano’ob yéetel u chi’ichnaktalo’ob. Lela’, tumen jayp’éel k’iino’ob paachile’, tu k’as jáakcha’abtaj úuchik u ya’alik ba’ax ma’ unaji’. 

“Jumpáay ba’al. Jach yaanal ba’al le takpool tin beetaj tu nu’ukbesajil El Chamuco, ba’ale’ lelo’ kin ka’a a’alik: kex k’as u ya’alale’, u yaj óolal wíinike’ ku ch’a’abal tumen jun jaats máako’ob ti’al u kaxtik u jóok’siko’ob uts ba’al chéen u ti’alo’ob”, tu ya’alaj. 

Tu ts’áaj k’ajóoltbil xane’, lalaj p’is k’iinile’ yaan u beeta’al k’a’aytajil tsikbal, ba’ale’ tu mola’ayil Secretaría de Salud, ma’ Palacio Nacionali’. 

Jala’ache’ tu k’áataj ti’ kajnáalo’obe’ ka u k’a’ajso’ob ba’axten kaxta’ab manbil táanxel tu’ux le ts’aako’obo’, beyxan ba’atel yanchaj tu táan máax u ti’alntmaj ka’ach u meyajil ts’aak, tumen ku tojoltik ka’ach 100 mil miyoonesil pesos, tumen chéen tu k’ab óoxp’éel nojoch mola’ayo’ob yaan ka’achij, kex ma’ paatal yéetel ko’oj le ts’aak ku koniko’obo’.  

Ba’atel táan u yantal tu táan máaxo’ob meyajtik yéetel beetik ts’aako’obe’, láayli’ yanchaj Estados Unidos, tu’ux ma’ cha’ab u k’exa’al a’almaj t’aan táan ka’ach u beeta’al tumen jala’ach Obama. “Beyxan u yúuchul wey Méxicoe’”, le beetik walkila’ táanxel tu’ux ku ma’anal ts’aako’ob, tu tsikbaltaj.   

Tu ya’alaje’ ts’aako’ob ti’al u ts’a’abal ti’ máaxo’ob tsaayal ti’ ts’unuse’ táan u t’o’oxol, táan u k’uchla’ajal, ts’o’okole’ ma’ táan je’elelo’ob tak kéen láaj yanak le k’a’abéete’. 

Xak'alutskíinsa'an tumen: Sasil Sánchez Chan