de

del

Ikil táan u bin u ya’abtal máax ti’ ku tsa’ayal u pak’be’en k’oja’anil coronaviruse’ yéetel tumen táan u náats’al u k’iinilo’ob je’elile’, u jala’achil u péetlu’umil Yucatán, beyxan u jo’olpóopil méek’tan kaajo’obe’ tu jets’ajo’ob ka k’a’alak k’áak’náab tu’ux ku k’uchul máak xíinximbal, je’el bix Progreso yéetel Telchac Puerto.

Ichil ba’ax a’alab tumen u jo’olpóopil Telchac Puerto, Juan Alfredo Marrufo Díaze’, kéen u chuk u chúumuk k’iin ti’ le viernesa’, leti’ kéen k’a’alal u nojbejil yaan tu jáalik le k’áak’náabo’, beyxan le uláak’ kúuchilo’ob ma’ jach táaj najmal je’ek’a’ab te’e kaajo’.  

U k’a’alal le jáal ja’ tu’ux ku páajtal u bin xíinximbal máake’, yaan u beeta’al chéen tu k’iinil viernes, sábado yéetel domingo, tak kéen ka’a je’ebek. Ma’ táan u páajtal u bin máak te’elo’ kéen u chuk láas 11 áak’ab, tumen kaaje’ unaj tu yotoch yaan. Chéen ku yutstsal u jóok’ol máak wa unaj u séeba’an bin yiknal ts’akyaj wa yóok’lal meyaj.  

 

También te puede interesar: Telchac Puerto: Muelle y malecón cerrarán de viernes a domingo

 

Beyxan kúuchilo’ob koonole’ yaan u béeytal u meyajo’ob je’el bix suukile’, ba’ale’ chéen wa tu chíimpoltajo’ob yéetel tu beetajo’ob ba’ax jets’a’an tumen jala’ach u ti’al u kaláanta’al u toj óolal kaaj. Najmal u k’a’abéetkunsa’al pix chi’.

U k’a’alal le kúuchilo’oba’ ku núup’ul yéetel uláak’ ba’al táan u beeta’al ti’al u kaláanta’al kaaj, yéetel k’a’ayta’ab le p’isk’iinil máaniko’, tumen u jala’achil Yucatáne’ tu k’a’aytaje’ u noj jáalbejil Progresoe’ yaanx an u k’a’alal, ti’al ma’ u k’uchul máak te’elo’ ikil u kaxta’al ma’ u ya’abtal máax ku k’oja’antali’.  

Ba’ale’, yóok’lal ba’ax yaan u yil yéetel otelo’ob beyxan kúuchilo’ob janal yaan te’e kaajo’, a’alabe’ je’el u páajtal u meyajo’ob, ti’ le súutukil jets’a’an ku béeytalo’, ba’ale’ u jach táaj k’a’ananile’, u cha’abal u yokol le jaytúul máak jets’a’ano’, tumen ma’ táan u páajtal u máan ti’ u chúumukil chuup le kúuchilo’.  

Beey túuno’, tu péetlu’umil Yucatáne’ cha’aban u na’akal chéen waxaktúul máak ti’ jump’éel cheem 40 pies u chowakil; beyxan éejenta’an u na’akal lajuntúul máak ti’ jump’éel chéem wa maanal ti’ 40 pies u chowakil.

Beyxan, u jala’achil u lu’umil Yucatáne’ ts’o’ok u jets’ike’ ma’ táan u k’exik u súutukil jets’a’an ti’al u páajtal u máan máak ich noj kaaj ka’alikil táan u k’iinilo’ob je’elile’, tumen aj xíinximbalo’obe’ ma’ táan u páajtal u jóok’olo’ob wa ts’o’ok 11:30 áak’ab.  

Tu péetlu’umil Yucatáne’ yaan jo’op’éel u jejeláasil u pak’be’en k’oja’anil coronavirus: mexikoil, brasilil, californail, bratinakail yéetel deltail.

Xak'alutskíinsa'an tumen: Sasil Sánchez Chan