Tu jáal ja'ilo'ob Yucatáne' táant u yúuchul jump'éel ba’al ma' úuchuk ti' le ts’ook 50 ja'aboba': áako'ob ti' u jejeláasil Lorae' k’ucho’ob e’el te'e baantaa', le beetike’ táan u beeta’al xaak'alo'ob ti’al u yojéelta'al ba’axten k'ucho'ob te'ela', ba’ale’ ba'ax tukulta'abe', úuch tumen ts’o'ok u k’éexel u chokolil wa u síisil ja' tu'ux yano'ob.
Melania López Castro, máax jo'olbesik u nu'ukbesajil Programa para la Conservación de la Tortuga Marina tu petenil Yucatáne', tu ya'alaje' jach séeba'an u jáan a'alal ba’axten k'uch le áako'oba'.
Lora áake' leti’e’ asab chichan yaan ichil le ukp'éel jejeláasil áak yaan yóok’ol kaab. U kuxtale' suuk u yúuchul Golfo de México. Ku káajal u yanal u mejenil kéen u chuk ichil 12 tak 19 ja'abo'ob. Kéen xuulchajako'obe' ku aaltalo'ob tak ichil 32 tak 49 kilos. Je' ku ye'elsike' ku p’isik ichil 34 yéetel 45 milímetros yéetel ku aaltal ichil 24 tak 40 gramos. Kéen tóop'ok u mejenile' ku p’isik ichil 42 tak 48 milímetros u sóol paach wa toj u p'i'isil.
También te puede interesar: Tortuga lora, pudo llegar a la península por cambio en la temperatura del mar
Xak'alutskíinsa'an tumen: Sasil Sánchez Chan
