Te’e k’iino’oba’ beeta’ab u yéeytambalil u kaláanta’al aalak’o’ob yéetel ba’alche’ob p’atano’ob chéen beey ich kaajo’, ichil u LXII Legislaturail ti’ u Congresoil u péetlu’umil Kaanpech. Máaxo’ob táakpaje’ jumpuul úcuhik u éejentiko’ob u ts’a’abal ichil u Waxjaatsil, ti’ u yóoxjaats ts’íibile’, ka yanak u si’ipil máax bíin u loobilt ba’alche’ob. Tu yóok’lale’, Alejandra González Marín, máax jo’olbesik u jatsmeyajil Medio Ambiente ichil u Ayuntamientoil Kaanpeche’, tu ya’alaj le ba’ax ts’o’ok u jets’a’ala’ yaan u beetik uts ti’ ba’ax táan u beeta’al ti’al u kaláanta’al ba’alche’ob yéetel yaan u yila’al u péeksa’al u yóol kaaj, beyxan u yuumil le aalak’o’obo’ ti’al u kaláanta’alob je’el bix unaje’.
También te puede interesar: En Campeche aprueban reforma que contempla el maltrato animal como delito
Ku tsikbaltik jach tu beel ba’ax le ts’o’ok u je’ets’el te’e a’almajt’aano’, tumen táan u kaxtik u chíimpolta’al beey kuxa’an ba’alche’ob yéetel unaj u kaláanta’alob, tak le chéen beey p’ata’ano’ob tu bejilo’ob kaaj. Ka’ache’ ts’a’aban te’e a’almajt’aano’ ba’ale’ mina’an u si’ipili’, tumen U Almejenil Noj A’almajt’aan le péetlu’umilo’ ma’ jeets’el ka’achili’. Ba’ale’ walkila’ je’ets’ u ts’a’abal u si’ipil máak kéen u loobilt ba’alchee’, ichil ka’ap’éel tak jo’op’éel ja’ab, yéetel unaj xan u to’okol ba’alche’ ti’al u kaláanta’al.
González Maríne’ tu chíimpoltaj k’a’anan ba’al le jets’a’abo’, tumen máaxo’ob ku ba’atelo’ob ti’al u chíimpolta’al u páajtalilo’ob ba’alche’, yéetel máaxo’ob tokik tu k’ab k’asa’an máako’obe’, u yojelo’ob leti’e’ ba’alche’ob ku asab loobilta’alo’ob tumen máaxo’ob ti’alintike’, ma’ chuka’an u yóolo’ob ti’al u kaláantiko’ob juntúul chan peek’, tumen yaan máako’obe’, chéen beey báaxal u yilko’ob je’el ba’axak peek’il ka u yilo’ob chéen beey u máan yóok’ol bej.
“Le ba’ax jets’a’aba’ yaan u péeksik u yóol kaaj, beyxan máaxo’ob mina’an ti’ob u yóol u kaláantiko’ob ba’alche’, yaan u jach jelbesik bix yanik ba’al, tumen táan u páa’ta’ale’ ka béeyak u chíimpolta’alob yéetel u yutsil k’a’amalo’ob, ti’al u k’as xu’ulul jump’íit u beeta’al u takpoolil ikil u p’a’atal peek’ jach tu chokolil k’iin, tu k’a’amil cháak, tumen ma’ táan u tséenta’al wa tumen ku loobilta’al, tukulta’al le ba’alo’obo’ jets’a’an yaan u si’ipil, le beetik najmal u chíimpolta’al”, tu ya’alaj.
Xak'alutskíinsa'an tumen: Sasil Sánchez Chan
