de

del

Úuchik u beeta’al u takpoolil yaan u jejeláasil ba’alo’ob ma’ patal beeta’anili’, ikil táan u meyajta’al u ts’ook jaatsil ti’ u xóot’il 1 ti’ u bejil Tren Maya, k’a’ayta’abe’ Fondo Nacional para el Fomento del Turismo (Fonatur) tu xot’aj meyaj ti’ u mola’ayil Barrientos y Asociados S.A. de C.V., le táan ka’ach u líik’sik bej táan u beeta’alo’ yeetel ti’ le k’ubéenta’an ka tsikbalnak yéetel éejidatario’ob ti’al u ch’a’ako’ob u t’aanil bix kun p’áatal k’áax tu’ux ku máan le bejo’, beey úuchik u k’a’aytik maáx beetik u legal láak’inajil éejidatario’ob ti’ u kaajil 5 de Febrero, tu méek’tankaajil Champotón, María Elena Pérez Pérez.

Ti’ múuch’tambalo’ob beetchaj ti’al u káajbal u winalil junio máanike’, éejidatario’obe’ tu takpoltajo’ob xan yaan ba’alo’ob ma’ patal táan u beeta’al ti’ le bo’ol táan u bin u ts’a’abal ti’ob, le beetike’ yanchaj u meyajnáalolo’ob u jala’achil u lu’umil México, jo’olbesa’ano’ob tumen Javier Rodríguez May, u subdirectoril Secretaría de Bienestar, tu ts’áajo’ob k’ajóoltbile’ ma’ xaan wa táan u beeta’al tuusil bo’oli’, le beetike’ yanchaj u kaxtiko’ob ba’al u beeto’ob, je’el bix u xot’iko’ob meyaj yéetel le mola’ayo’.

 

También te puede interesar: Cancela Fonatur contrato con la empresa Barrientos y Asociados

 

Te’e k’inako’obe’ Pérez Péreze’ tu ya’alaje’, yaj óol ka yanak u xu’ulul múul meyaj wa ma’ táan u yáax tsola’al ba’axten yanchaj u tse’elel meyaji’, je’el bix xan u yojéelta’al ba’ax kun úuchul yéetel taak’in ma’ k’uch tu’ux unajo’, tumen ma’ patal úuchik u k’a’abéetkunsa’ali’, tumen máax chíikbesik Barrientos y Asociados, Alejandro Velazco Izuka, tu ya’alaje’ jaaj beey úuchik u beeta’al ba’alo’. Tu ya’alaje’, ka’atúul máak ku meyaj ka’ach te’e mola’ayo’, leti’e’ tu beetajo’ob ba’al ma’ patali’, ba’ale’ ts’o’ok u yojéelta’al máaxo’obi’, ts’o’okole’ tse’elo’ob ti’ le meyaj ku beetiko’obo’ yéetel ta’ak u poolo’ob tumen le mola’ayo’. 

Le miércoles máanika’ Pérez Péreze’ tu ya’alaj ts’o’ok u xot’a’al meyaj yaan ka’ach ichil Fonatur yéetel le mola’ayo’; beyxan a’alabe’ mina’an jump’éel ts’íib tu’ux ka k’a’ayta’ak ba’ax táan u je’ets’el tumen u jo’olpóopilo’ob Méxicoe’, mix xan tumen u kúuchil Comunicación Social ti’ u jaatsilo’ob Tren Maya tu lu’umil Kaanpech.

Tu kúuchil u kaxta’al u yuumilo’ob Barrientos y Asociados, tu lu’umil Kaanpeche’, p’aatal ichil kúuchil k’ajóolta’an beey Consejo Coordinador Empresarial de Campeche (CCEC), a’alabe’ ma’ táan u cha’abal u yokol máaki’ tumen walkila’ ts’o’ok u p’a’atal le kúuchilo’ tumen le mola’ayo’, tu ya’alaje’ “ts’o’ok ka’ap’éel p’isk’iinil káajak u púutik u nu’ukulo’ob, ts’o’okole’ chéen ku túuxta’al wa máax u ch’a’a ba’ax táan u binetik ti’obo’”.  

Beyxan, máx jo’olbesik CCEC, Víctor del Río R de la Gala, tu ya’alaje’ ts’o’ok u p’áatal mina’an máax chíkbesik le mola’ayo’, tumen “k’a’ayta’abe’ ma’ táan u k’a’abéetkunsiko’ob tuka’atéen le kúuchilo’, le beetik leti’ob k’a’abéetkunsik walkila’”, ba’ale’ tu ts’ooke’ tu ya’alaje’ je’el u páajtal u bin ilbil wa jaaj le juevesa’.  

Ti’ u mola’ayil Barrientos y Asociadose’ jets’a’an ka’ap’éel mokt’aanil meyaj yéetel Fonatur, tu’ux unaj u bo’ota’al óoli’ 90 miyonesil pesos, ti’al u líik’sik yéetel u beetik bej ti’al u máan Tren Maya, beyxan ti’al u tsikbal yéetel u jets’ik u ma’anal u k’áaxil éejidatario’ob ti’al u yúuchul meyaji’. 

Xak'alutskíinsa'an tumen: Sasil Sánchez Chan