Te’e k’iino’ob máano’oba’, beeta’ab u keetil áalkab Ultramaratón de los Cañones, suuk u beeta’al ja’ab man ja’ab tu méek’tankaajil Guachochi, Chihuahua, tu’ux ku mu’uch’ul maanal 600 u túul aj áalkab máako’ob ku ketikubáajo’ob ichil u chowakil beel 21, 61 yéetel 100 kilómetros, tu baantail Barranca de Sinforosa.
Lorena Ramírez, juntúul x-áalkab jach k’ajóolta’ab ti’ le keetil máaniko’, k’uch tu yóox kúuchil ichil u beelil 100 kilómetros.
Rarámuri ko’olele’, tu yáalka’abtaj le beyka’ajo’ ichil 12 ooráas yéetel 20 minuutóos, ts’o’okole’ je’el bix suukile’, áalkabnaj yéetel nook’ suuk u búukinta’al ti’ tarahumara kaajil, beyxan yéetel u k’éewel xanab.
También te puede interesar: Corredores rarámuris triunfan en el Ultramaratón de los Cañones
Táan u jacj páa’ta’al u yila’al ba’ax kun úuchul yéetel, tumen leti’ beyxan u kiik yéetel u suku’uno’obe’, María Juana, José Mario yéetel José Antonio Ramírez, jach k’ajóolta’ano’ob yóok’lal bix u yáalkabo’ob, ts’o’okole’ ti’ le ts’ook winalo’oba’ jach táan u ts’áak u yóolo’ob ti’al jump’éel keetil yaan u beeta’al tu lu’umil Argentina.
Lorenae’ p’áat paachil tu keetil 100 kilómetrose’, úuchik u yáax k’uchul x áalkab Alex Roudayna, máax p’áat tu yáax kúuchil, úuchik u xáantal 11 ooras yéetel 10 minuutos; tu paache’ ti’ k’uch Anahí Rivera, úuchik u beetik 11 ooras yéetel 45 minuutos.
María Juana Ramírez, u kiik Lorenae’, tu béeykunsaj u yáax kúuchil tu keetil 63 kilómetros, ka’alikil José Antonioe’ tu béeykunsaj u ka’a kúuchil láayli’ ti’ le bejil je’elo’.
Talina, uláak’ juntúul u kiik Lorenae’, k’uch tu kan kúuchil ichil u keetil 100 kilómetros.
Te’e ja’aba’, ch’a’ajolta’ab u beeta’al Ultramaratón de los Cañones, tumen le ja’ab máaniko’, ma’ yanchaj tu yóok’lal pak’be’en k’oja’ani’. U jo’olpóopil u kaaj Guachochi, Hugo Aguirre Garcíae’, leti’e máax beet u wáak’al u káajbal le áalkabilo’.
Júpiter Carrera Casas, máax síij Ciudad de Méxicoe’, leti’e’ máax náajalt u keetil 100 kilómetros ku beeta’al ichil xiib, yéetel Onorio Tomás Juáreze’, máax síij Guachochi, tu náajaltaj u yáax kúuchil ichil u keetil 63 kilómetros láayli’ ichil u yáalkabil xiibo’ob.
Xak'alutskíinsa'an tumen: Sasil Sánchez Chan
