Ka’atúul maaya ko’olel bona’ab ti’ jump’éel pak’, tu kaajil Cacalchén, tu’ux ku chíikpajalo’ob tu tséel juntúul báalam. U poolo’obe’ jats’utskíinsa’an yéetel chaay, beyxan yéetel xíiwo’ob suuk u yantal te’e lu’uma’; bona’an xan jump’éel ch’óoy yéetel jáalador tu’ux ku xo’okol “utsil meyaj”. Te’e meyajo’ ts’a’aban u muuk’il ko’olel ku kóojol tu yich máaxo’ob ilik kéen máanako’ob te’elo’.
Meyaje’ pata’ab u k’aaba’ beey Mural trabajadoras del hogar, beeta’ab tumen x yukatekail its’at Draya Madú, máax táax u kaxtik u chíikbesik u ya’abil ko’olel máaxo’ob beetik u meyajil ich naj, beyxan táan u beeta’al ti’al u kaxta’al ka chíimpolta’ak u páajtalil ko’olel kéen jo’op’ok u meyaj.
También te puede interesar: Artista yucateca plasma en mural la fortaleza de las trabajadoras del hogar
U beeta’al boonile’ táakmuk’ta’an tumen u múuch’kabil Jade Propuestas Sociales y Alternativas al Desarrollo, A. C., máaxo’ob t’an Drayu ti’al u meyajtik, máax tu ya’alaje’ ma’ili’ u beete’, tsikbalnaj yéetel jaytúul ti’ u ko’olelilo’ob le kaajo’, máaxo’ob beetik u meyajil ich naj, ti’al u yu’ubik ba’ax k’a’abéet ti’ob, ba’ax chi’ichnakkúunsiko’ob yéetel ba’ax ku tukultiko’ob, ti’al u páajtal u ts’áak te’e boonilo’.
Báalame’, tu ya’alaj, ku chíikbesik u muuk’il le ko’olelo’oba’, beyxan tumen leti’ob kaláantik u yotocho’ob yéetel u baatsilo’obi’. Beyxan tu tsikbaltaj le meyaja’, chéen jump’éel bix u ti’alinkúunsa’al u kúuchilo’ob kaaj tumen u wíinikilo’obi’, tumen ku páajtal u táakpajalo’ob yéetel u múul meyajo’ob ti’al u kaláantiko’ob, ti’al ma’ u k’askúunta’ali’.
Beey túuno’, Raquel Aguilera Troncoso, máax jo’olbesik Jadee’, tu k’a’aytaj yéeya’ab Cacalchén ti’al u beeta’al le yáax boonila’, tumen ichil ba’ax chíikpajl ti’ xaak’al beeta’ab tu ja’abil 2020: U x meyajilo’ob ich naje’, leti’e’ asab chíikpaj tu’ux yanchaj talamilo’ob tu yóok’lal Covid-19.
Xak'alutskíinsa'an tumen: Sasil Sánchez Chan
