Maanal ti’ junk’aal ja’abo’ob máan ka’aj ts’ook náajalta’ab oro ichil u keetilo’ob Juegos Olímpicos tumen Soraya JIménesz, tu lu’umil Sidney, ti’ u ja’abil 2000. Walkila’, le domingo máanika’, yanchaj uláak’ juntúul x ch’úuy peesas síij tu lu’umil México páatchaj u ka’a náajaltik jump’éel u medaayail bronsee. Náajalta’ab tumen Aremu Fuentes, ichil u jaatsil 76 kilograamos, ichil u keetilo’ob Tokio 2020.
Tu kúuchik Foro Internacional p’aatal ti’ u noj kaajil japones lu’umile’, x chiapasile’ béeychaj u much’ik 245 kilos, úuchik u béeytal u yáax ch’úuyik 108 kilograamos tu káajbal, yéetel uláak’ 138, ti’al beyo’ u páajtal u ts’a’abal ti’ u noj lu’umil México u yóoxp’éel medaayail ti’ le keetilo’ob táan u báaxta’al te’e k’iino’oba’.
Kex tumen tu káajbal béeychaj u ch’úuyik le 105 kiloso’, ti’al u ka’atéenil úuchik u máane’ talamchaj ti’ u ch’úuyik 108i’, ba’ale’ kex beyo’, béeychaj u beetik. Ti’al túun u ch’úuyik 110, ma’ páatchaji’, le beetike’, chéen te’e súutuko’, ti’ j p’áat tu kamp’éel kúuchil. Chéen ka’ap’éel kilos táan u betik ti’ ka’ach ti’al u k’uchul ti’ u yóox kúuchil (111 kg).
También te puede interesar: Aremi Fuentes se lleva el bronce para México en levantamiento de pesas
Beey túuno’, ichil jaats k’ajóolta’an beey envióne’, leti’e’ tu’ux jach kaambanaja’an Aremie’, káaj yéetel 135 kilos, yéetel ka tu beeta’aj tu ka’atéenile’, béeychaj u ts’áak uláak’ uláak’ óoxp’éel kilos. Ti’ u yóoxtéenil u ch’úuyaje’, tu yóotaj u líik’s 139 kilos, ba’ale’ ma’ béeychaji’.
X ecuadaroil Nelsi Patricia Dajomes tu náajaltaj oro, úuchik u ch’úuyik 263 kilos; Elizabeth Nye, máax síij tu lu’umil Estados Unidose’, tu náajaltaj plata úuchik u líik’sik 249 kilos.
Alexa Moreno, uláak’ ko’olel tu ts’íibtaj u k’aaba’ ti’ u k’ajla’ayil México
Beyxan, uláak’ juntúul ko’olel tu ts’íibtaj uláak’ noj k’a’anan chíikul ichil u k’ajla’ayil Méxicoe’, x gimnastail Alexa Citlali Moreno Medina, máax tu béeykunsaj u p’áatal tu kamp’éel kúuchil, ichil gimnasia artística, tu ts’ook keetil salto de caballo. Tu ts’ooke’, tu much’aj 14.716, te’e keetil beeta’ab Tokio, Japón.
Ka’aj yáax síit’naje’, u talamil ba’ax tu beetaje’ p’isa’an yéetel 5.800, ichil bix u na’atal gimansia, le beetike’ j ts’a’ab ti’ 14.766 puuntos; ka’alikil tu ka’atéenil úuchik u síit’e’, u talamile’ p’isa’an yéetel 5.600, tu’ux tu k’amaj 14.666 puuntos, ti’al beyo’, u yantal tu ts’ooke’ 14.716. Yéetel le beyka’ajo’ j p’áat tu kamp’éel kúuchil le keetilo’, tumen chéen 0.017 puuntos tu binetaj ti’ ti’al u páajtal u k’uchul tu yóox kúuchil, tu’ux yaan ka’ach u náajaltik u medaayail broonse.
Yéetel ba’ax tu beetaje’, Moreno Medinae’ máan táanil ti’ ba’ax beeta’an ka’ach tumen uláak’ ka’atúul mexicoilo’ob yáax máano’ob ti’ le keetila’: juntúule’, Daniel Corral, máax j p’áat tu jo’o kúuchilil, walkil bolonp’éel ja’ab, tu lu’umil Londres, 2012; yéetel tumen ba’ax beeta’ab tumen Denisse López, walkil 21 ja’abo’ob, tu lu’umil Sídney, ti’ u j’aabil 2000, máax chíikpaj beey u yáax ko’olelil, ti’ u lu’umil México, tu ketajubáaj ti’ le jaatsila’.
“Teene’, tin beetaj ba’ax unaj in beetik, síitnajen je’el bix in kanmajo’, le beetik tene’ ki’imak in wóol yéetel ba’ax tin beetaj; in wojel kex u chúumukil máaxo’ob táakpaj ti’ le ts’ook keetila’, ka’anal yanik u talamil síit’ kéen u beeto’obo’, le beetik unaj in beetik tuláakal ba’al tu beel ti’al u jóok’ol je’el bix unaje’, tu ya’alaj Moreno.
U yáax kúuchilile’, náajtalta’ab tumen x brasilil Rebeca Andrade, máax tu much’aj 15.083; u ka’a kúuchilile’ náajalta’ab tumen estadunidenseil Mykayla Skinner, máax ti’ yanchaj 14.916 puuntos tu ts’ook, yéetel bronsee’ náajalta’ab tumen surcoreanail Seojeong Yeo, máax ti’ yanchaj 14.733 puuntos.
Xak'alutskíinsa'an tumen: Sasil Sánchez Chan
