U noj bejil xíinximbalil yaan yóok’ol u bejil 59 ti’ u K’íiwikil u noj kaajik Kaanpeche’, u ye’esajil u ma’alobkúunsa’al ba’al ti’al kaaj, je’el bix u k’a’alal bej ti’al u yutsil yantal aj koonolo’ob, kajnáalo’ob yéetel xíinximbal máako’ob, beey tu ya’alaj Carlos Ernesto Rosado Ruelas, máax tu beetaj u jo’olpóopil Kaanpech, yéetel máax péektsiltik Peatonalización ma’ ts’o’oksa’aki’, mix táan u yilik u k’iinil u ts’o’okol.
Tu k’a’ajsaje’, walkil bolonp’éel wa lajun ja’abe’, ma’ béeychaj u beeta’ali’ tumen yanchaj jaytúul aj koonolo’ob yéetel kajnáalo’ob máaxo’ob ts’áak majáantbil ba’ax u ti’alo’ob ti’ máaxo’ob k’amik aj xíinximbalo’ob, je’el bix u ko’onol janal yéetel ba’al ti’al uk’bile’, tumen ku bo’ota’al tak yóok’ol 40 mil pesos ichil jump’éel winal.
”Walkila’, u páajtal u xíimbal máak te’e kaajo’ jump’éel ti’ u jach no’ojanul ba’alo’ob yaan ti’ le kaajo’, ts’o’okole’ ku páajtal in wa’alike’, jump’éel ti’ le ba’axo’ob beetik u nonojchajal náajal yaan te’e kaaja’, tak yóok’ol Plaza comercial Galerías, tumen sáansamal yaan máaki’, sáansamal u yantal máax ku yuk’uli’ wa ku yuk’ik wa ba’axi’”, tu ya’alaj.
También te puede interesar: Peatonalización del centro campechano, proyecto exitoso pero inconcluso
Ka’aj yáax k’a’ayta’ab u tuukul meyajil tu táan u kajnáalilo’ob u bejil 59e’, ma’ jach uts úuchik u k’a’amali’, tumen leti’obe’ tu tukultajo’obe’ ma’ táan u páajtal u je’elelo’ob tu táan u yotocho’obi’, saajko’ob ti’ u seen juum ba’al; ts’o’okole’ aj koonolo’obe’ tu ya’alajo’obe’ ma’ u k’áato’ob tumen yaan u yantal u kaxtiko’ob uláak’ tu’ux kun bin u yéens u kuucho’ob.
Le beetik ku k’a’ajsike’, xáanchaj kex wakp’éel winalo’ob táan u beeta’al múuch’tambalo’ob ti’al ka éejenta’ak le meyajo’, tumen tukulta’ab u yantal u k’a’alal u bejil 53 yéetel 8. Le yáaxo’ leti’e’ asab chowak bejil yaan ti’ u K’íiwikil le noj kaajo’, ts’o’okole’ ku k’áatal tak tu’ux yaan u méerkadoil Pedro Sainz de Baranda, tak tu kúuchil Partido Revolucionario Institucional (PRI); u ka’ap’éelile’ leti’e’ ku jóok’ol tak Concha Acústica, le beetike’ ku yila’al beey u noj bejil miatsil.
Uláak’ noj bej táaxkunsa’ab ti’al u páajtal u máan máake’, leti’ u bejil 53, ba’ale’ u k’iinilo’ob meyaj jo’olpóope’ ma’ chúukpaj ti’al u ts’o’oksiki’. Yóok’lale’ Rosado Ruelase’ tu ya’alaje’ ma’ chéen ch’a’abil le meyajo’, tumen kéen yanak u k’a’alal bejo’obe’ ma’ táan u séeb éejenta’al tumen tuláakal máak, ba’ale’ walkila’, ts’o’ok u máan lajun ja’ab úuchik u káajal u meyaj le noj bejo’obo’, ts’o’okole’ ku yila’al u yutsile’ tumen láayli’ u meyajo’ob tu beele’.
Xak'alutskíinsa'an tumen: Sasil Sánchez Chan
