Ba’ax úuch ka’aj kíim José Eduardo Ravelo, máax pata’an ka’ach u k’aaba’ El Güero, ts’o’ok u k’uchul tak tu xikin u jo’olpóopilo’ob u noj lu’umil México. Ba’ale’, je’el bix tu ya’alaj le martes 17 máaniko’, máax beetik u séekretariail Gobernación (Segob), Olga Sánchez Cordero, tu k’amaj Dora María Ravelo, u maama le xi’ipal kíimo’. Múuch’o’ob tu kúuchil le mola’ayil yaan Ciudad de México, ti’al u yu’uba’al ba’ax ku k’áatik ikil táan u kaxtik ka ts’a’abak u si’ipil máax kíins u paalilo’.
Táakpaj xan máaxo’ob chíikbesik Comisión Ejecutiva de Atención a Víctimas Asistencia( CEAV) beyxan Consejo Nacional para Prevenir La Discriminación (Conapred), ti’al u yáanta’al je’el bix unaje’. Láayli’ te’e súutuko’, ti’ yanchaj uláak’ juntúul u paalil María Ravelo, Irving Covián Ravelo yéetel u áabogadoil, Andrés Nieves Cervantes.
También te puede interesar: FGR abre carpeta de investigación por muerte de José Eduardo
FGR tu káajsaj xaak’al
Fiscalía General de la República (FGR) tu ts’áaj k’ajóotlbil ti’ k’a’aytajil ts’íib le martes máanika’, ts’o’ok u káajsa’al xaak’al tumen Fiscalía Especial para la Investigación del Delito de Tortura.
Le beetike’, k’áata’ab ti’ Fiscalía General de Justicia del Estado de Yucatán, ka ts’a’abak tuláakal ba’ax k’a’abéet ti’al u múul meyaj jo’olpóopo’ob, ti’al u páajtal u sáasilkúunsa’al ba’ax úuchij.
Jala’ach Andrés Manuel López Obradore’ tu k’áataj ka ts’a’abak u si’ipil máaxo’ob beetej, tak jo’olpóopo’ob wa tumen táan u baliko’ob u kuucho’ob.
U Ayuntamientoil Jo’e’ tu túuxtaj k’uben ts’íib ti’ AMLO
U Ayuntamientoil Jo’e’, tu ts’áaj k’ajóoltbil k’a’aytajil ts’íibe’, tu túuxtaj k’uben ts’íib ti’ u jala’achil México, tu’ux ku ka’a je’ets’el tumen jo’olpóop Renán Barrera Concha, “yaan u yóol le Ayuntamientoo’ ti’al ka úuchuk múul meyaj yéetel júudisiialo’ob, ti’al u sáasilkúunsa’al bix úuchik u kíimil J.E.R.E., tu noj kaajil Jo’”.
Beyxan tu ya’alaje’, p’el úuchik u yojéeltik ba’ax úuche’, tu k’áataj ka beeta’ak ba’ax k’a’abéet ti’al u béeytal u ts’aatáanta’al je’el ba’axak ka k’áata’ak ti’al u sáasilkúunsa’al ba’ax úuchij.
Uláak’ ba’ax ojéelta’abe’, páayt’anta’ab áabogado David Dorantes Cabrera, máax ku t’aan tu yóok’lal aj kaanan kaajo’obe’, ti’al u kóojol Ciudad de México bejla’a 18 ti’ agosto, ti’al u tsikbaltik “ba’axten jets’a’ab tumen juees Rómulo Antonio Bonilla Castañeda ma’ unaj u k’a’alalo’obi’”.
Xak'alutskíinsa'an tumen: Sasil Sánchez Chan
