de

del

Foto: Juan Manuel Valdivia

"Tak walkila’ yéetel ba’ax ts’ook jets’a’an ti’ bix táan u yila’al u taal u k’a’amkach cháakil Gracee’, ma’ xaan ka k’uchuk tak tu jáail ja’ilo’ob Quintana Roo, tu noojolil Tulum, ba’ale’ wa ka úuchuke’ míin yaan u beetik beey chak ik’al káategorya uno, ts’o’okole’ tukulta’an u kóojol tu sáasbal le miércolesa’ 18 tak le jueves 19 ti’ agostoa’”, beey tu ts’áaj k’ajóoltbil u jala’achil u péetlu’umil Quintana Roo, Carlos Joaquín, úuchik xan u k’a’aytik u ya’ax sajbe’entsil ikil táan u náats’al le iik’o’.

Sajbe’entsil jets’a’ane’ unaj u ch’a’anukta’al tumen u méek’tankaajilo’ob José María Morelos, Felipe Carrillo Puerto, Tulum, Solidaridad, Cozumel, Puerto Morelos, Isla Mujeres, Benito Juárez yéetel Lázaro Cárdenas. Ichil ba’ax táan u ch’úukta’al tumen Centro Nacional de Huracanes de Miami, u k’a’amkach ja’il Gracee’ yaan u ch’a’ak u muuk’ yéetel yaan u kóojol tu péetlu’umil Quintana Roo tu yáak’abil le miércolesa’, wa tu yáax súutukil ti’ u k’iinil jueves. 

 

También te puede interesar: Decreta QRoo alerta verde por acercamiento de 'Grace'

 

Carlos Joaquín tu jo’olbesaj le martes máanika’, u meyajil Sesión Extraordinaria del Consejo Estatal de Protección Civil beyxan Seguimiento del Comité de Atención al Fenómeno Hidrometeorológico “Grace” del Mar Caribe. Te’e múuch’tambalo’, tu ts’áaj u yojéelt kaaj ba’ax bejil táan u ch’a’ak le k’a’amkach cháako’, le beetike’ tu k’áataj ka beeta’ak ba’ax ku k’áata’al ti’al u kaláanta’al kaaj ti’ le k’iino’ob ku taalo’oba’.  

Tu jets’aje’, tuláakal u mola’ayilo’ob jala’ache’ unaj u ts’aatáantiko’ob yéetel u kaláantiko’ob u kuxtal yéetel u ba’alumbáaj u kaajil Quintana Roo, beyxan ka u jach u’uyo’ob ba’ax táan u yúuchul yéetel le k’a’amkach cháako’, ti’al u péeko’ob kéen k’a’abéetchajak, maases tu’ux táan u yila’al yaan u jaats’.  

Ti’ kaaje’ tu k’áataj ka u yil mantats’ ba’ax ku ya’alal tumen le cháako’, chéen ti’ ba’ax ku jóok’sa’al tumen jala’ach ti’ u reedes sosiialesil @CarlosJoaquin y @ProtCivil_QRoo.

“Walkila’, u muuk’il u jaats’ iik’e’ p’isa’an tak 72 kilómetros por hora; ti’al túun u súutul chak ik’ale’ unaj u k’uchul tak 117 kilómetros por hora, ts’o’okole’ 21kilómetros por hora u chichil u péek tu baantail le chik’ino’”, beey tu tsolaj u jala’achil Quintana Roo.

Ichil ba’ax a’ala’ab tumen máax jo’olbesik Coordinación Estatal de Protección Civil, Adrián Martínez Ortega, te’e péetlu’umo’ yaan 85 refugios yáax juntéen u ts’a’abalo’obi’, ti’ le je’elo’obo’, óoxp’éele’ ti’ yano’ob Cozumel, kamp’éele’ Isla Mujeres, 25e’ Benito Juárez, jo’op’éele’ Lázaro Cárdenas, ka’ap’éele’ Solidaridad, waxakp’éele’ Tulum, ukp’éele’ Puerto Morelos yéetel 21e’ tu noojolil le péetlu’umo’, ts’o’okole’ yaan u ts’a’abalo’ob meyaj kéen je’ets’ek chak k’aank’an sajbe’entsil te’e lu’umo’.

Xak'alutskíinsa'an tumen: Sasil Sánchez Chan