U “suut paalal kaambal x ma’ sajbe’entsilile’” ti’ najilo’ob xooke’ je’el bix a’alan unaj u yúuchul tumen u jo’opóopilo’ob u lu’umil Yucatáne’, yaan u yúuchul bejla’a 30 ti’ agosto, tumen yaan u je’ebel u joolnajilo’ob le kúuchilo’ob tuka’atéeno’, tu jo’oloj jump’éel ja’ab yéetel uláak’ táanchúumuk úuchik u yantal u yúuchul kaambal tu yotoch máak.
Te’e lunesila’, k’a’am taatsilo’ob te’e najilo’ob xooko’, ti’al u tiskbalta’al ti’ob bix kéen máanak u xookil 2021-2022, tumen xoknáalo’obe’ unaj u káajsiko’ob xook tu k’iinil 6 ti’ septiembre, ba’ale’ yaan u bino’ob najil xooke’ chéen wa beey tu jets’ajo’obo’.
Ti’al el bejla’o’ u tuukulile’, leti’ u tsikbalta’al ti’ taatatsilo’ob ba’ax k’a’abéet u yantal ti’ob ti’al u suuto’ob kaambal te’e najilo’ob xooko’, yaan xan u núukiko’ob k’áat chi’ob ti’al beyo’ u yojéeltiko’ob ba’ax k’a’abéet ti’al u jets’iko’ob bix u k’áato’ob ka úuchuk le xooko’, tu yotocho’ob wa ti’ najilo’ob xook.
También te puede interesar: En Yucatán, el regreso a clases será hasta el 6 de septiembre
Aj ka’ansajo’ob túune’, yaan u páajtal u yojéeltiko’ob jaytúul xoknáalo’ob yaan u yantal ti’al u káajsa’al xook te’e kúuchilo’obo’, ti’al beyo’ u jach jéets’el bix kéen suunak máaki’, beyxan wa yaan u k’a’abéetchajal u ja’atsal múuch’o’ob wa ma’.
Le ja’abil xookila’, yaan u ts’o’okol 8 ti’ julio ti’ u ja’abil 2022, ts’o’okole’ beey dée yéeybil yanik bix kéen suunak paalal xooke’, láayli’ yaan xan u p’a’atal u páajtalil u kaambalo’ob ti’ Internet.
U mola’ayil Secretaría de Salud Estatale’ tu ts’áaj k’ajóoltbile’, ts’o’ok u ts’a’abal báakunail Covid-19 ti’ 98 por siientoil aj ka’ansajo’ob; kex u 75 por siientoile’ ts’o’ok u ts’a’abal u yáax jaatsil yéetel u 50 por siientoile’ ts’o’ok u chúukpajal u ka’a jaatsili’, “le je’elo’ ku yáantaj ti’al u káajal u p’a’atal ba’al tu beel ti’al u ch’a’ajolta’al u beeta’al ba’al, tak kaambal”.
Le sábado máaniko’, máax jo’olbesik Secretaría de Educación estatal, Liborio Vidal Aguilar, tu ts’áaj k’ajóoltbil u nu’ukbesajil Protocolo Estatal de Regreso a Clases tu táan 140 u p’éel najilo’ob xook, ti’ le 250 u p’éel táakbesa’an ichil Asociación Mexicana de Escuelas Particulares A.C. (Amepac) Yucatán, jo’olbesa’an tumen Elías Dájer Fadel.
Kúulpach ti’ le je’elo’, aj ka’ajsajo’obe’ tu beetajo’ob xíimbalil líik’saj t’aan, le 26 ti’ agosto máaniko’, ti’al u chíikbesiko’ob ma’ ki’imak u yóolo’ob tumen yaan u yantal u suuto’ob meyaj te’e najilo’ob xooko’, tumen ku tukultiko’obe’ sajbe’entsil ti’al xoknáalo’ob. Tu ya’alajo’obe’, yaan tu’uxe’ mina’an mix ja’, ts’o’okole’ ma’ chuka’an u nu’ukulil ti’al u kaláanta’al paalali’.
Xak'alutskíinsa'an tumen: Sasil Sánchez Chan
