Rosario Ruiz / Miguel Améndola / Joana Maldonado
U ya’abil u najilo’ob xook ti’ u níibel báasikoil yéetel meedio súuperiore’ p’áat k’aalalil tak tu k’iinil 30 ti’ agosto, tumen leti’e’ k’iin jets’a’ab unaj u suut paalal kaambal te’e najilo’ob xooko’. Máax jo’olbesik Secretaría de Educación ti’ u péetlu’umil Quintana Roo, Ana Isabel Vásquez Jiménez, tu ts’áaj k’ajóoltbile’ chéen 41 u p’éel puublikóo kúuchilo’ob, yéetel 300 u p’éel pribaado’obe’, tu káajsajo’ob xook le lunes máanika’.
Vásquez Jiménez tu ya’alaje’ yanchaj mil 200 u túul xoknáalo’ob, ti’ le 360 mil ts’íibta’an u k’aaba’obe’, suunaj te’e najilo’ob xooko’. Tu tsolaje’ ti’al u béeytal u suut máak te’e kúuchilo’obo’, unaj u ts’aatáanta’al 28 ba’alo’ob yéetel u je’ets’el jump’éel nu’ukbesaj ti’al le xoknáalo’obo’.
También te puede interesar: Quintana Roo opta por el retorno a clases virtual
“Leti’e’ najilo’ob xook kéen u jets’o’ob bix kéen úuchuk ba’al, mina’an u k’iinil ti’al u beetiko’ob, láayli’ táan u tsikbalta’al (bix kun suuto’ob)”, tu ya’alaj x séekretaria. Aj ka’ansajo’obe’ káaj u meyajo’ob le lunesa’: “u ya’abile’ táan u bin meyaj te’e najilo’ob xooko’, chéen máaxo’ob yaan uláak’ wa ba’ax k’oja’anile’ láayli’ u meyajo’ob ti’ Internet”.
Beyxan, tu ya’alaj, yanchaj 1.4 por siientoil xoknáalo’ob tu p’atajo’ob xook, ba’ale’ láayli’ p’aatal óoxp’éel winalo’ob ti’al u “kaxta’al” uláak’o’ob.
Ti’ xíimbalil beeta’ab ti’al u yila’al bix yanik ba’al te’e najilo’ob xooko’ tu méek’tankaajilo’ob Cancún, Playa del Carmen yéetel Tulume’ béeychaj u yila’ale’ u ya’abile’ láayli’ k’aalalo’obe’. Yanchaj preeskolaro’ob suunaj meyaj tu kaajil Playa del Carmen, ba’ale’ jach kaláanta’an bix úuchik u beeta’al; yaan uláak’ tu’uxo’obe’ táan u meyajta’al ti’al u p’a’atal tu beel.
Tu kaajil Tulume’, chéen tu najil xook Octaviano Solís Aguirre jets’a’ab u suut máak kaambal te’elo’ ti’al u ja’abil xok 2021-2022. Yanchaj jaytúul paalal biinsa’abi’. Juntúul ko’olel tu biinsaj u paalile’ tu ya’alaje’ tu jets’aj u bisik tumen je’el u kaambal tu beel beyo’, ts’o’okole’ tumen ma’ táan u chúukpajal ti’ ba’ax k’a’abéet ti’al u ch’a’ak xook ti’ Internet.
Tu kaajil Cancúne’ chéen ti’ jayp’éel páartikular najilo’ob xook bin máaki’, yéetel xa’ak’an meyaj kéen u beeto’ob; kex beyo’, tu séekundariail Nassim Joaquín Ibarra jach ja’atskab k’iin ka’aj káaj u k’uchul xoknáalo’ob.
Xak'alutskíinsa'an tumen: Sasil Sánchez Chan
