Kex yanchaj jump’éel múuch’kabil kaaj k’ajóolta’ab beey Tres Barrios tu’ux táakpaj u kajnáalilo’ob Santa Lucía, La Ermita yéetel Camino Real, ts’o’okole’ yaan áamparo’ob ts’a’ab tumen múuch’kabilo’ob kaláantik máaya kaajo’ob, je’el bix Consejo Regional Indígena Popular de Xpujile’ (CRIPX), x jala’ach yéeya’an tu lu’umil Kaanpeche’, Layda Sansores San Román, tu ts’áaj u kuuch u áayuntamientoil Kaanpech yóok’lal ba’ax jets’a’ab tumen Fondo Nacional de Fomento al Turismo (Fonatur), tumen k’a’ayta’abe’ Tren Mayae’ ma’ táan u yokol ich kaaj, chéen tu bak’pachil kun máan.
Tu ya’alaje’ Eliseo Fernández Montúfare’ leti’e’ máax beet u k’uuxil u kajnáalilo’ob Tres Barrios tumen chéen jaytúul ti’ leti’ob ma’ u k’áato’ob ka’ach ka máanak u beel Tren te’e ich kaajo’, le beetik tu ya’alaje’ yaan u yila’al wa je’el u páajtal u beetiko’ob wa ba’ax ti’al ma’ u sa’atal le taak’in táan ka’ach u ts’a’abal ti’al u beeta’al le meyaj te’e lu’umo’.
También te puede interesar: Culpa Layda Sansores a alcalde de Campeche por reubicación del Tren Maya
“Yaan k ilik yéetel yaan k xak’altik ba’ax je’el u páajtal k beetik ti’al ma’ u sa’atal ba’ax yaan ka’ach u yantalo’, k k’áat ka yanak noj k’eexilo’ob Kaanpech, ts’o’okole’ u ts’a’abal taak’in ti’al u beeta’al meyajo’obe’ ku beetik u chan yantal jump’íit ti’ le beyka’aj ba’al ts’o’ok u sa’atal yóok’lal pak’be’en k’oja’an”, tu ya’alaj.
Beyxan tu tsikbaltaje’, ichil múuch’tambal yanchaj yéetel Rogelio Jiménez Pons, máax jo’olbesik Fonature’, le 3 miyoonesil pesos jatsa’an ti’al u yúuchul meyaj te’elo’, ts’o’ok u tse’elel, ba’ale’ wa ka yanak ka’ache’ yaan u k’a’abéetkunsa’al ti’al u k’e’exel u táanil najo’ob k’ajóolta’an beey casonas.
Ba’ale’, Lurdes Ganzo Rivera, máax táaka’an ichil u múuch’kabil Tres Barriose’, tu ya’alaj Sansores San Románe’ ma’ u yojel ba’ax ku ya’alik tumen mix juntéen kajlak Kaanpech, ts’o’okole’ leti’obe’ ma’ tu ts’áaj u yéeyajilo’ob ti’ Eliseo Fernández Montúfar tumen leti’ xane’ ma’ tu yóotaj u yáanto’ob ti’al u k’áatiko’ob ka k’e’exek u beel Tren ku máan ich kaaj.
“Kéen yanak yéeytambale’, to’one’ k a’alik ti’ máaxo’ob ku báaxalo’obe’ ba’ax k k’áat, ba’ale’ le ko’olela’ ma’ u yojel mix ba’ali’ tumen ka’alikil táan u k’iinilo’ob káampañae’ mix juntéen wa’alaj weye’, ts’o’okole' mantats’ ti’ yaan Ciudad de México”, tu ya’alaj.
Tu ya’alaj xane’, yaan xak’aalo’ob beeta’an ti’al u yila’al wa no’oja’an u ts’a’abal u beel chimes k’áak’ te’elo’, ka’aj ila’abe’ ma’ no’oja’an lu’umil u ti'al.
Xak'alutskíinsa'an tumen: Sasil Sánchez Chan
