Bejla’a 13 ti’ septiembree’, ts’o’ok u ts’a’abal meyaj óoxp’éel kúuchilo’ob tu noj kaajil Jo’, ti’al u ts’a’abal u báakunail Covid-19 ti’ je’el máaxak ma’ u k’am mix jun jaatsi’, kex ba’al ti’ beyka’aj u ja’abil, chéen unaj maanal 18.
Ti’ jump’éel k’a’aytajil ts’íib k’i’itbesa’ab ti’ Facebooke’, Huacho Díaz Mena tu ts’áaj k’ajóoltbile’, ch’a’ab u t’aanil u ts’a’abal báakuna ti’ máaxo’ob p’áato’ob paachil “máax ti’ ma’ ts’a’abak mix junjaats báakunai’”.
Kúuchilo’ob ts’a’ab u ti’ale’ let’ le je’elo’oba’: Centro de Convenciones Siglo XXI, Deportivo Kukulkán yéetel Deportivo La Inalámbrica; Díaz Mena tu ya’alaje’ “k’a’ajse’ex báakunae’ je’el u beetik u k’éexel ba’al ti’al u yantal kuxtal wa u yúuchul kíimil”, ku páayt’anta’al kaaj ti’al u ts’a’abal ti’.
U súutukil jets’a’ab ti’al u bin máak te’e kúuchilo’obo’, ku káajal láas 8 ja’atskab k’iin yéetel ku ts’o’okol tak las 6 tu taal u chíinil k’iin. Ti’al u ts’a’abale’ unaj u biinsa’al ju’un ku k’áata’al ichil u kúuchil Internet: https://mivacuna.salud.gob.mx/index.php.
También te puede interesar: Este lunes podrán vacunarse personas que no haya recibido ninguna dosis en Mérida
Ba’ax ku k’áata’al ti’ máak ti’al u ts’a’abal báakunae’ leti’ le je’ela’: u k’uchul máak kex 15 minutos aantes, beyxan u biinsik u INE máak, kéen xi’ike’ unaj ts’o’ok u janal yéetel ts’o’ok u luk’ik u ts’aak wa tumen k’a’abéet; kéen ts’a’abak ti’ máake’ unaj u páa’tik kex 30 minutos ti’al u yila’al ma’ táan u yúuchul mix ba’al ti’.
Kéen ts’a’abak le yáaxo’, yaan u ts’a’abal k’ajóoltbil ti’ k’a’aytajil ts’íibo’obe’ ba’ax k’iin kéen je’ets’ek u ts’a’abal u ka’a jaatsilo’, le beetik unaj mantats’ u yilik máak ba’ax ku k’a’ayta’al.
Le 11 ti’ septiembre máanika’, ojéelta’ab yanchaj 298 máax ti’ pa’ak’ le k’oja’anil ku tsa’ayal yóok’al u biirusil SARS-CoV-2, beyxan yanchaj uláak’ 16 u túul máak kíim tumen; le beetike’ ku páayt’antik máak ti’al ma’ u ch’éenel u kaláantikubáaj, tumen beyo’ ma’ táan u tsa’ayal; beyxan tu k’áataj ka ts’a’abak báakuna ti’ máak kéen béeyak.
Secretaría de Salud ti’ u lu’umil Yucatáne’ tu ts’áaj k’ajóoltbile’, ti’al máax yaan u ja’abil ichil 18 tak 29, ts’o’ok u yáax ts’a’abal ti’ 139 mil 324 u túul máak u yaax jaatsil báakuna COVID-19, ts’o’okole’ jo’oljeak domingo 12 ti’ septiembree’, ts’o’oksa’ab u ts’a’abal ti’ le jaats kaajila’. Bejla’e’ láayli’ yaan u ts’a’abal ti’al je’el máaxak ma’ ts’a’abaki’, kex ba’al ti’ jayp’éel ja’ab yaan ti’ máak.
Le 11 ti’ septiembre máanika’, ts’a’ab 28 mil 778 u p’éel u báakunail AstraZeneca ichil u jaats kaajil 18 tak 29 u ja’abil; 8 mil 659 ti’ j ts’a’ab tu kúuchil Centro de Convenciones Yucatán Siglo XXI; 4 mil 910 tu kúuchil Multigimnasio “Socorro Cerón” ti’ Unidad Deportiva Kukulcán; 2 mil 948 tu kúuchil Unidad Deportiva Inalámbrica, 880 tu kúuchil Gimnasio Polifuncional; 3 mil 151 tu najil ts’akyaj Hospital Militar Regional de Especialidades (HMRE); mil 940 tu najil xook Escuela Superior de Artes de Yucatán (ESAY), 2 mil 640 tu kúuchil Unidad Deportiva Villa Palmira; mil 890 tu kúuchil 11 Batallón de Infantería yéetel mil 760 tu kúuchil Base Aérea Militar Número 8.
Yóok’lal u yutsil ts’aake’, tu ya’alajo’obe’, tu winalil agosto ila’abe’, ti’ lajuntúul máak yanchaj u yoksa’al tu kúuchil ts’akyaj yóok’lal Coronaviruse’, waxaktúule’ mina’an mix junjaats ti’ le báakunao’, le beetik k’a’anan u ts’a’abal, ti’al u kaláanta’al u toj óolal kaaj.
Xak'alutskíinsa'an tumen: Sasil Sánchez Chan
