Kúuchilo’ob koonole’ yaan u páajtal u k’amiko’ob u 100 por siientoil máak ku páajtal u yokolo’obe’, ba’ale’ chéen juntúul máak ichil jump’éel baatsil kun cha¡abal u yokol, beyxan yaan u páajtal u je’ebel kúuchilo’ob ku meyajo’ob dée áak’ab yéetel baares, chéen ba’axe’ u páajtalil u ko’oniko’ob ba’al ti’al káaltale’ cha’aban miércoles tak sábado, láas 11 ja’atskab k’iin tak láas 6 tu taal u chíinil k’iin.
También te puede interesar: Campeche cambia restricciones por nuevo semáforo epidemiológico
Tuláakal ba’ax ts’o’ok u jets’a’ale’ yaan u bin u k’éexel je’el bix kéen xi’ik u yila’al ba’ax kun a’albil tumen Secretaría de Salud del Estado, tumen ts’o’ok jump’éel p’iis k’iin káajak u yéemel u xookil jaytúul máax ti’ ku tsa’ayal Covid-19.
Walkila’ ts’o’ok u yéemel u 50 por siientoil máax ti’ ku tsa’ayal le k’oja’anil sáansamala’, beey chíikpaj ti’ u ts’ook sajbe’entsil k’a’ayta’ab le 6 ti’ septiembre máaniko’, tu’ux tu méek’tantaj tak u k’iinil 17 máaniko’, tumen leti’ úuchik u k’a’ayta’al tumen Secretaría de Salud del Estado de Campeche yaan u k’éexel u boonil chak k’aank’an ti’al u súutul k’aank’an, tu’ux ku ya’alal sajbe’entsile’ táan u bin u yéemel; ka’ap’éel p’iis k’iinil kéen p’áatako’ob beya’, káaj jo’oljeak lunea yéetel yaan u ts’o’okol le 3 ti’ octubre ku taala’.
Yóok’lal le túumben jeets’ila’ yaan u páajtal u káajal u meyaj kúuchilo’ob k’ala’an ka’achij, ikil u kaxta’al u kaláanta’al kaaj. Jayp’éel ti’ le je’elo’obo’, ts’o’okili’ u káajal u meyajo’ob, ba’ale’ walkila’ yaan u páajtal u ya’abtal le jaytúul máak ku páajtal u k’a’amali’ yéetel uláak’o’obe’ táan u páa’tiko’ob ka je’ets’ek ya’ax boonil sajbe’entsil ti’al u páajtal u maas xáantal u ko’onol uk’be’en ba’al ti’al káaltal.
Ichil k’eexilo’ob táan u chíikpajalo’obe’ ti’ yaan u páajtal u chuup k’a’amal máak ichil súupermeerkados, ba’ale’ chéen juntúul máak ichil jump’éel baatsil kun páajtal u yokoli’; beyxan yaan u páajtal u beeta’al cha’ano’ob je’el bix kóonsiertos, ba’ale’ yaan u táanilkúunsa’al ba’ax jets’a’an ti’al u kaláanta’al kaaj, je’el bix u ts’a’abal jeel yéetel u p’i’isil u chokwil máak.
Beyxan cha’ano’ob kun beetbile’, yaan u jach kaláanta’al tumen u mola’ayilo’ob toj óolal yéetel tumen u Ayuntamientoil Kaanpech. Kúuchilo’ob koonol, plaasas, kúuchilo’ob janal, otelo’ob, esteetikáas yéetel jimnaasiose’ yaan u páajtal u k’amiko’ob máak tak tu 75 por siientoil u chuupil, ka’alikil kúuchilo’ob balts’am, siines, kúuchilo’ob báaxal ja’ yéetel ti’al náaysaj óolo’obe’ yaan u páajtal u k’amiko’ob máak tu 50 por siientoil u chuupilo’ob.
Xak'alutskíinsa'an tumen: Sasil Sánchez Chan
