de

del

Yanchaj yáax aj ka’ansajo’ob bo’ota’ab u peensiono’ob yéetel u xookil salaaryóo minimóo

En QRoo, cuatro docentes jubilados logran cobrar en salarios mínimos
Foto: Rodrigo Díaz Guzmán

Kantúul aj ka’ansajo’ob ti’ u péetlu’umil Quintana Rooe’ béeychaj u  jets’ik u bo’ota’al ti’ob u pensiono’obe’ yéetel le beyka’aj jeets’el salaaryóo minimóo, ma’ yéetel Unidad de Medida y Actualizacióni’ (UMA), beey úuchik u k’a’aytal tumen máax beetik u séekretaryo jéeneralil Sección 25 ti’ u múuch’kabil SNTE, Fermín Pérez Hernandez.

Ti’al u káajbal le ja’ab yaniko’ona’, SNTEe’ káaj u ba’ateltik yéetel u yáantajil a’almaj t’aan ku meyajta’al tumen Colegiado Jurídico ti’ SNTEe’, tumen pension ku bo’ota’al ti’obe’ jets’a’ab  yéetel u p’iisil UMAS, le beetike’ yanchaj u much’iko’ob a’almajt’aano’ob ti’al u kaxtiko’ob u k’uchulo’ob tu táan Comisión Interamericana de Derechos Humanos yéetel uláak’ mola’ayo’ob, tumen le je’elo’ ku beetik u péech’óolta’al páajtalilo’ob yaan ti’ aj meyajo’ob, tumen ku yéemel le beyka’aj unaj u ts’a’abal ti’obi’.

Ti’al febrero ti’ le ja’ab máaniko’, Segunda Sala de la Suprema Corte de Justicia de la Nación (SCJN) tu jets’aje’, u jach ya’abil pensión ku páajtal u bo’ota’al tumen Instituto de Seguridad y Servicios Sociales de los Trabajadores del Estado (ISSSTE) unaj u je’ets’el yéetel ba’ax chíimpolta’an ichil Unidad de Medida y Actualización (UMA), ba’ale’ le je’elo’, ku k’exik ba’ax jets’a’an ichil u deesimóo jaatsil ti’ u a’almajt’aanil ISSSTE tu’ux ku ya’alik bo’ole’ unaj u je’ets’el yéetel le bajux jeets’el salaaryóo minimóo.

 

También te puede interesar: En QRoo, cuatro docentes jubilados logran cobrar en salarios mínimos

 

Ti’ UMAe’ jets’a’an u bo’olile’ 89.62 pesos, ka’alikil ich salaaryóo minimóo ku bo’ota’al 141.7 pesos, le beetike’, kéen xo’okok le beyka’aj yaane’, ku taal u ts’áake’, ku p’íitchajal le taak’in unaj u bo’ota’al ti’ máax kéen u yoks u ju’unil u pensión yéetel le xookila’.

Le martes máaniko’, yéetel u láak’inajil máax chíikbesik Comité Nacional, Raymundo Valdivia Hernández, tu k’ubajo’ob núuktajil ts’a’ab ti’ob tumen SNTE, tu’ux chíimpolta’ab u páajtalil kantúul aj ka’ansajo’ob, máaxo’ob yaan u bo’ota’al u pensiono’ob te’e octubrea’, ba’ale’ yéetel salaaryóo minimóo, beyxan yéetel le beyka’aj ts’o’ok u múuch’ul lik’ul 2017.

Ba’ax jets’a’abe’ uts taalik ti’ aj ka’ansajo’ob Oscar Jesús Romero Hernández, María del Carmen Hu Chan, Mariana Medina González yéetel Miguel Ángel Romero Ávila.

Xak'alutskíinsa'an tumen: Sasil Sánchez Chan