Máax jo’olbesik Tribunal Superior de Justicia del Estado (TSJE), Virginia Leticia Lizama Centurióne’, tu ya’alaje’ yaan juntúul juees yéetel juntúun máajistraadóo ma’ táan u chíimpolta’al ba’ax tu beetaj leti’, tumen tu k’áataj ti’ juntúul u paalile’ ka ch’éenek u meyaj te’e tu’ux yano’, úuchik u meyaj bolonp’éel ja’abo’ob Poder Judicial. Tuláakal le je’ela’ tu tsikbaltaj tu súutukil táan Jaguar, káaj u beeta’al tumen u jala’achil Kaanpech ti’al u beeta’al uts k’a’aytajilo’ob yéetel tak poolo’ob ka’alikil táan u yúuchul meyaj.
Lizama Centurióne’ tu ya’alaj u paalile’, máax tu ts’o’oksaj u xookil íinjenieryail kóomunikasyon yéetel sisteemas díijitalese’, ook meyaj TSJEe’ ba’ale’ ts’o’okili’ u p’atik u meyaj leti’ beey juees, chéen ba’axe’ úuchak u suut u jo’olbes meyaj te’e kúuchilo’, tsikbalnaj yéetel u paalil ti’al u ya’alik ti’ ba’ax meyajil kéen u beet tu táan Poder Judicial, le beetike’, ma’ili’ okok u beet u meyaje’, tu k’áataj ti’ ka u p’at meyaj ts’a’aban ti’.
También te puede interesar: Nepotismo en el Poder Judicial de Campeche, confirma su titular
“Tin tukultaje’, kéen in beete’, yaan xan u beeta’al tumen u jeel jueeso’ob yéetel máajistrado’ob táakano’ob meyaj ichil Poder Judicial; jaaj, yanchaj jaytúul ti’ leti’ob tu paktajo’ob ba’ax tin beetaj, ba’ale’ yaan ka’atúul in wéet meyajo’obe’ ma’ taak u ch’a’ajolto’ob ba’ax táan k beetik, tumen yéetele’, táan k e’esik yaan keetil ba’al ichil máaxo’ob ts’o’ok u seen ts’áak u yóolo’ob ti’al u béeytal u ts’a’abal wa ba’ax meyajil ti’ob te’elo’; ma’ táan in wa’alik wa u láak’alo’ob ma’ tu ts’áaj u yóolo’ob ti’al u yantal meyaj ti’ob te’elo’, ba’ale’ je’el beyka’aje’, ojéela’an bix u péek ba’al ichil le mola’ayo’”, tu tsikbaltaj.
Tu ya’alaje’ yaan xan u kaxtik ka seen tsikbalta’ak ba’al, yéetel walkila’ ma’ táan u seek k’áatik ka xo’ot’ok meyaj ti’ u láak’alo’obi’. Ba’ale’ yaan u kaxtiko’ob ka ts’a’abak meyaj ti’ máako’ob jach kaambanaja’ano’ob ti’ ba’ax yaan u yil yéetel keet óol.
Ma’ seen úuchake’, tu méek’tankaajil Carmene’, Pablo Gutiérrez Lazarus máax beetik u jo’olpóopil kaaje’ tu jets’aj Samantha Bravo Muñoz yaan u jo’olbesik Seguridad Pública, ba’ale’ leti’e’ u yaal Marcela Muñoz Martínez, leti’ máax jo’olbesik Secretaría de Seguridad Pública (SSP) tu lu’umil Kaanpech.
Xak'alutskíinsa'an tumen: Sasil Sánchez Chan
