Máax beetik u séekretaaryail Desarrollo Urbano, Obras Públicas e Infraestructura (Seduopi), Karla Gelisle Sánchez Sosa, tu ka’a jets’aj tu táan máax beetik u jala’achil u lu’umil Kaanpeche’, Layda Sansores San Román, ichil meyaj unaj u beeta’al ti’al u líik’sa’al Ciudad Administrativae’ yaan kóontratos bo’ota’an ti’ mola’ayo’ob ma’ tu beetajo’ob ba’ax unaji’, ts’o’okole’ yaan xan máaterial ma’ ojéela’an tu’ux yaani’.
Ka’aj ook meyaj túumben jala’ache’, x meyajnáale’ páayt’anta’ab tumen Edilberto Buenfil Montalvo, máax jo’olbesik ka’ach Seduopi, ti’al u xíimbalkunsa’al te’e tu’ux ku beeta’al le meyajo’obo’, ti’al u ye’esa’al ti’ ts’o’ok u beeta’al kex u 90 por siientoil le kúuchilo’.
También te puede interesar: Obras fantasmas en la Ciudad Administrativa de Campeche: Seduopi
Tu jo’oloj túun ka’ap’éel k’iino’obe’, Buenfil Montalvoe’ tu beetaj k’a’aytajil tsikbal ti’al u ya’alike’, meyajo’ob ti’al u líiksa’al kúuchile’, ts’o’ok u chukik u 90 por siientoil, yéetel ti’al bin u beeta’ale’ k’a’abéetchaj 750 miyoonesil pesos, ts’o’okole’ mina’an p’aax ti’ máaxo’ob mana’ab u nu’ukulil u beeta’al.
Ba’ale’ Sánchez Sosae’ ma’ ki’imak u yóol yéetel ba’ax e’esabij, ts’o’okole’ ka’aj tu ch’a’ajolt u meyaj te’e Mola’ayo’, ts’o’ok u bin u xíimbalt le kúuchilo’ yéetel ts’o’ok xan u beetik xaak’alo’ob ti’al u jach ilik bix táan u beeta’al meyajo’ob te’elo’, le beetike’, ka’alikil u machmaj tuláakal u ju’unilo’obe’, tu ya’alaj yaan ba’al táan u binetik, beyxan ma’ ya’ab meyaj beeta’ani’, yéetel bo’ol beeta’an ti’ mola’ayo’ob ma’ chíikpajak ti’ le kúuchilo’; ma’ je’ex úuchik u k’a’ayta’al tumen aj meyajo’ob ts’ook yanchajo’ob te’e mola’ayo’.
X séekretaaryae’ páayt’anta’ab tsikbal tu súutukil Martes del Jaguar, meyaj patjo’olta’ab tumen Layda Sansores San Román, ti’al u k’a’aytik ba’al ti’ kaanpechilo’ob, óoli’ je’el bix u beeta’al te’e “Mañanerao’”. Te’e súutuko’ Sánchez Sosae’ tu ya’alaj yaan u ju’unilo’ob bo’ol jumpáay yaniko’ob ti’ Ciudad Administrativai’, ts’o’okole ma’ chika’an tu’ux beeta’ab le wa ba’axo’; ku tukultike’ láaj wáay meyaj.
X séekretaarya tu ya’alaje’, kéen ts’o’okok u láaj xak’alta’al u ju’unilo’ob meyaje’, yaan u káajal u péeko’ob tu táan juridikóo ti’al u yilko’ob ka beeta’ak nojoch xaak’al tumen Auditoría Superior del Estado de Campeche (Asecam), yéetel yaan xan u k’áatiko’ob ka beeta’ak uláak’ xaak’al tumen Secretaría de Contraloría (Secont), tu yóok’ol máax jo’olbesik ka’ach Seduopi yéetel yóok’ol uláak’ máax táakano’obi’.
Tu ts’ooke’, tu ya’alaje’, yaan xan bo’olo’ob láayli’ p’axa’an ti’ mola’ayo’ob k’ubik u nu’ukulil u beeta’al kúuchil, ba’ale’ mix ojéela’an tu’ux p’aatali’, ts’o’okole’ wa ma’ táan u chíikpajale’, mola’ayo’obe’ yaan u tse’elelo’ob ti’al ma’ u ka’a ma’anal ba’al ti’ob tumen le Péetlu’umilo’.
Xak'alutskíinsa'an tumen: Sasil Sánchez Chan
