Tu k’iinilo’ob meyaj Jorge Carlos Hurtado Valdez tu kaajil Kaanpeche’, leti’e’ ka’aj p’áat tu k’ab u mola’ayil Red Ambiental u máan molbil u ta’il míis; u fiskaal najile’ ti’ yaan Nuevo Léon, ts’o’okole’ lik’ul u ja’abil 2002, tak walkila’, leti’e’ mola’ay ku meyaj te’e kaajo’, ts’o’okole’ leti’ unaj u jatsik tuláakal le ba’ax ku máan u molo’, beyxan u túumbenkúunsik kiis buuts’ ku k’a’abéetkunsik u ti’al yéetel u kaláanta’al ka utsuk meyaj kúuchul tu’ux ku láaj pu’ulul ba’ali’.
Beey túuno’, táan u tukulta’al u yantal u ja’atsal kaaj ti’al u máan ch’a’abil u ta’il míis, ba’ale’ mola’aye’ ma’ u ye’es wa yaan u ts’áak u yóol ti’al u beetik, le beetike’ yanchaj u jóok’sa’al wakjaats ti’ le noj kaajo’, yéetel uláak’ jump’éel ti’al u máan ch’a’abil ba’al Centro Histórico, ba’ale’ tumen jeets’el beey Patrimonio Cultural de la Humanidad, unaj sáansamal u máan ch’a’abil u ta’il míisili’, tumen k’a’anan ti’al le kaajo’.
También te puede interesar: Red Ambiental, 19 años a cargo de la recoja de basura en Campeche
Beey túuno’, mola’aye’ u ts’áamaj meyaj xan uláak’ mejen kisbuuts’o’ob ti’al u mo’olol u ta’il míis ti’ jayp’éel tu’uxo’ob te’e kaajo’, tu’ux xan ku míista’al yéetel ku líik’sa’al u jejeláasil ba’alo’ob pula’an te’e bejo’obo’.
Mola’aye’ tu ts’áaj k’ajóoltbil ti’ k’a’aytajil ts’íibe’, lik’ul 20 ti’ septiembre ti’ u ja’abil 2002e’, leti’ ka’aj káaj u meyaj tu noj kaajil Kaanpech, ts’o’okole’ tumen ma’alob u beetik u meyaj ti’ kaajo’obe’ Red Ambientale’ tu k’amaj u chíimpolalil Ética y Valores en la Industria, k’uba’ab tumen La Confederación de Cámaras Industriales (CONCAMIN).
Erika Bautista, máax beetik u jeerenteil Responsabilidad Social ichik Red Ambiental, tu ya’alaje’ talamilo’ob yaan ti’al u máan molbil yéetel u meyajta’al u ta’il míis je’el bix unaje’ mina’an walkila’ tumen ka’aj ook meyaj Red Ambiental tu k’iinil 20 ti’ septiembre ti’ u ja’abil 2012e’, úuchik u túumbenkuunsa’al yéetel u ma’alobkúunsa’al bix táan u beetiko’ob meyaj ti’al u máan molbil ba’al ich kaaj, tumen le je’elo’ u ti’al u yutsil tuláakal u kajnáalilo’ob Kaanpech.
Te’e noj kaajo’, ku jóok’ol kex 5 mil u tóoneladasil ta’il míis ichil jump’éel winal; ma’ili’ yanak túun u kúuchil tu’ux ku biinsbil ti’al pulbile’, chéen beey u pu’ululo’, ts’o’okole’ le je’elo’ ku beetik k’aas ti’ le lu’umo’, beyxan ti’ ba’alche’ob, tumen ma’ táan u chúukpajal meyaj ku beeta’al ti’al tuláakal ba’ax k’a’abéeto’.
Xak'alutskíinsa'an tumen: Sasil Sánchez Chan
