Walkila’, ts’o’ok u k’u’ubul 734.7 miyoonesil pesos ti’ u mola’ayil Secretaría del Trabajo y Previsión Social, ti’al u su’utul ba’alo’ob to’ok tu k’iinil oka’an u beet u jala’achil Roberto Borge Angulo, tumen tak tu ts’ooke’ luk’sa’ab jo’op’éel otelo’ob tu kaajil Tulum, ka’ap’éel najo’ob tu kaajil Benito Juárez yéetel taak’in, beey úuchik u ts’a’abal k’ajóoltbil tumen Catalina Portillo Navarro, máax jo’olbesik le mola’ayo’. Beyxan, tu ts’áaj k’ajóoltbile’ béeychaj u ts’a’abal meyaj ti’ 58 mil 223 u túul máak ichil u enero tak agoso ti’ le ja’ab yaniko’ona’.
Tu súutukil úuchik u beeta’al k’a’aytajil tsikbale’, Portillo Navarroe’ láak’inta’ab tumen máax jo’olbesik u meyajil Comunicación Social, Fernando Mora Guillén. Te’elo’ le x séekretaryao’ tu ya’alaje’, beeta’ab ba’al ti’al u chíimpolta’al takpool beeta’abe’, úuchik u to’okol ba’al ka’alikil táan borgistail k’iino’ob.
“Ti’al u yila’al tumen máaxo’ob ts’áak taak’in ti’al u yúuchul meyaj tu péetlu’umil Quintana Roo mina’an mix jumpíit sajbe’entsile’, k e’esike’ tuláakal t’aan wa takpool ku beeta’ale’, yaan u ya’alal ti’ máax k’a’abéete’ ti’al u ts’a’abal u páajtalil u déefendeerta’al ba’al kéen beeta’ak juiisyo, yéetel ti’al ma’ u yúuchul ba’al je’el suuk u yúuchul ka’acho’”, tu ya’alaj Catalina Portillo.
También te puede interesar: Restituyen cinco hoteles, dos casas y dinero despojado en era Borge
Portillo Navarro tu ya’alaje’ ti’ le jo’op’éel ts’ook ja’abo’ob meyaje’, ts’o’ok u yila’al ka su’utuk ti’ u yuumilo’obe’ tuláakal ba’ax to’okij, úuchik u beeta’al x ma’ paatal juuisyo’obi’.
Tuláakal le ba’alo’ob suta’ano’obe’, ku chukik 734.7 miyoonesil pesos, “leti’ le bajux ts’o’ok u tojoltik ba’ax jeel suta’ab yéetel leti’e’ beyka’aj ts’o’ok u béeytal k xíimbaltiko’, ba’ale’ kex beyo’ yaan ba’al táan u binetik k beetik ti’ le ts’ook ja’abil meyaj táan u binetika’”, tu ya’alaj.
Beyxan séeekretarya tu ya’alaje’ tu ja’abil 2020e’, éem le jaytúul meyaj yanchaj ti’ máake’, tumen sa’at 97 mil 381 u p’éel meyajo’obi’, ba’ale’ ichil enero tak agostoe’ béeychaj u ts’a’abal 58 mil 223 u p’éelal, yéetel tu ts’ooke’ ku taal u chíikpajale’, yanchaj 424 mil 6 u túul aj meyajo’ob ts’íibta’ab u k’aaba’ ti’al ka yanak u chuka’an bo’olilo’ob yéetel u ju’uno’ob je’el bix unaje’.
Xak'alutskíinsa'an tumen: Sasil Sánchez Chan
