de

del

Foto: Enrique Osorno

Le ja’ab ku talaa’, u jala’achil le péetlu’umila’ yaan u k’a’abéetkunsik kex 340 miyoonesil pesos ti’al u ma’alobkúunsa’al u beelil u máan u kamionilo’ob Circuito Metropolitano yéetel Circuito Colonias, ichil uláak’ meyajo’ob tukulta’an u beeta’al, beey úuchik u ya’alik Rafael Hernández Kotasek, máax jo’olbesik Instituto de Movilidad y Desarrollo Urbano Territorial (IMDUT).

Ich k’áatchi’ tsikbal tu beetaj yéetel La Jornada Mayae’, tu ya’alaje’ táan u beeta’al meyajo’ob ti’al u túumbenkúunsa’al kisbuuts’o’ob, u nu’ukulilo’ob k’a’abéet yéetel meyajo’ob unaj u beeta’al ti’al u yutsil péek máak ich kaaj yéetel ti’al u no’ojan yantal máak te’e kaaja’.

Beyxan tu ya’alaje’, táan u yila’al ka yanak utsil beel ti’al u máan máak xíimbalil, beyxan máax ti’ yaan wa ba’ax díiskapasidaad, máaxo’ob nat’ik t’íinchaj balak’ ool, ichil uláak’ ba’alo’ob.

 

También te puede interesar: En 2022, Yucatán invertirá alrededor de 340 mdp en rutas de camiones

 

Ichil ba’ax a’alab tumen Hernández Kotasek, yaan bin jump’éel nu’ukbesaj tukulta’an u beeta’al ichil Circuito Metropolitano yéetel Circuito Colonias, tu’ux ku páajtal u nup’a’al tu’ux ku k’áatal l ebejo’oba’, ti’al u yantal tu’ux u k’áatal máax ku xíimbal, x ma’ sajbe’entsilil yéetel ich kananil.

Beyxan, tu tsiklbaltaje’ yaan u túumbenkúunsa’al u kisbuuts’ilo’ob, ti’al u yantal tu’ux u na’akal uláak’ máako’ob; u ts’a’abal braille ts’íib, ti’al máax ma’ sáasil u yichi’; u tuukulil xane’ ka béeyak u na’aksa’al t’íinchak balak’ ook te’elo’, u yutskíinsa’al bejo’ob, u je’ets’el u kúuchil u na’akal yéetel u yéemel máak.

Hernández Kotaseke’ tu p’ataj tséelik u tuukulil u beeta’al jump’éel túumben bej ti’al u máan kisbuuts’, tumen le jach k’a’abéet ka’acho’, leti’e’ yaan u máan tu bak’pachil u noj kaajil Jo’.

Ts’o’okole’ yaan u káajal u k’éexel ba’al ich kaaj, je’el bix u ts’a’abal máaseteroos tu K’íiwikil Jo’, yóok’ol u bejil 60, tak yóok’ol u bejil 47, ti’al u páajtal u kaláanta’al máak kéen máanak xíimbalil te’elo’.

Xak'alutskíinsa'an tumen: Sasil Sánchez Chan