Ti’ le ts’ook lajun ja’abo’oba’ u p’aax péetlu’umilo’obe’ ka’ap’éelchaji, tumen ka’ache’ 314 mil 664.5 miyoonesol pesos p’axa’an ba’ale’ walkila’ ts’o’ok u náakal 637 mil 274.6 miyoonesil. Auditoría Superior de la Federacióne’ (ASF) ku ya’alike’ le beyka’aj ts’o’ok u p’a’axalo’ ku beetik u p’áatal ich sajbe’entsil taak’in unaj u yantal ti’ob ti’al u páajtal u meyaj u jala’achil u kaajilo’obi’.
Ichil xaak’altuukul beeta’al ti’al u yila’al bix kéen k’a’abéetkunsa’ak taak’in 2021e’, ASFe’ ku ya’alike’, kex tumen jaaj u ya’abil péetlu’umo’obe’ ts’o’ok u kaxtik u yéensiko’ob le bajux u p’axmajo’obe’, yaan wakp’éel ti’ le je’elo’obo’ ku chíikpajalo’ob tumen táan u nonojtal: Zacatecas, Campeche, Morelos, Coahuila, Yucatán yéetel Chihuahua; leti’obe’ ya’abchaj u p’aaxo’ob ichil u 165 yéetel 718 por siientoil ichil lajunp’éel ja’abo’ob.
También te puede interesar: Estados no recaudan, pero sí piden
Ichil u yáax óoxp’éel winalo’ob u ja’abil 2021e’, taak’in p’axa’an tumen péetlu’umo’ob, méek’tankaajo’ob yéetel kúuchilo’ob meyaje’ náak 630 mil 722.5 miyoonesil pesos, le je’elo’ ku chíikbesik ya’abchaj yóok’ol u 1.5 por siientoil, ti’ le beyka’aj jach jaaj yanchaj tu yáax óoxp’éel winalo’ob le ja’ab máaniko’. Ka’alikile’, 18 u p’éel péetlu’umo’obe’ béeychaj u yéensik u p’aax, je’el bix Tlaxcala, tu’ux tu yéensaj 74.6 por siientoil u p’aaxi’.
Ba’ale’ wa ku ke’etel yéetel bix úuchik u ts’o’okol u ja’abil 2020e’, taak’in p’axa’an tumen péetlu’umo’obe’ éem 3.3 por siientoil, le je’ela’ ku chíikbesik 6 mil 552.2 miyoonesil pesos. Ti’ bolonp’éel péetlu’umo’obe’ ya’abchaj taak’in p’axa’an yéetel ti’ 23 u p’éelale’ éemij.
Ichil u ja’abil 2010 tak 2020e’, p’aax yaan ti’ péetlu’umo’obe’ ya’abach ja’anmanja’abe’ kex yóok’ol u 2.9 por siientoil. Ka’alikile’, péetlu’umo’ob ku chíikpajal tumen ya’abchaj u p’aaxo’obe’ leti’ le je’elo’oba’: u meedial úuchik u ya’abtal ja’abmanja’ab Zacatecase’ 23.4 por siientoil tumen ka’ache’ 682 miyoonesil p’aaxa’an 2010, ba’ale’ náak 8 mil 496.9 miyoonesil pesos ti’ak u ja’abil 2020; Kaaneche’ ya0abchaj yóok’ol u 20 por siientoil, Morelose’ yóok’ol 11.9 por siientoil, Coahuila náak 11.8, Yucatán k’uch tak 11.4 yéetel Chihuahua náak 10.3 por siientoil.
Xak'alutskíinsa'an tumen: Sasil Sánchez Chan
.jpg)
