Tu ja’abil 2020 tak walkila’, yanchaj kex 45 u túul u xoknáalilo’ob súuperior kaambale’, túuxta’an tu kúuchil Psiquiátrico de Yucatán tumen unaj u yáanta’al u tóoj óol u tuukulo’ob, beey tu k’a’aytaj máax jo’olbesik Secretaría de Investigación, Innovación y Educación Superior (Siies), Mauricio Cámara Leal.
“45 u p’éel ba’al táan u beeta’al ti’al u kaláanta’al ma’ u kíinsikubáaj máak, kin wilik yanchaj 45 u túul máak ma’ tu luk’saj u kuxtali’ tumen láak’inta’abo’ob yéetel áanta’abo’ob”, tu ya’alaj.
Beey úuchik u tsikbaltik Cámara Leal úuchik u beetik u tse’ekil Educación en tiempo de pandemia ¿qué hemos aprendido?, beeta’ab ka’alikil táan Smart City Expo LATAM Congress 2021, tu kúuchil Centro Internacional de Congresos (CIC).
Xoknáalo’obe’ túuxta’abo’ob Psiquiátrico ti’al u k’amiko’ob áantaj ku ts’a’abal tumen sikoologóos, sikiatráas jach kaambanaja’ano’ob; beyxan túuxta’abo’ob DIF yéetele a la Secretaría de la Mujer.
También te puede interesar: Atiende Psiquiátrico de Yucatán a 45 estudiantes de educación superior
Cámara Leale’, tu ya’alaj xane’ u pak’be’en k’oja’anil Covid-19e’ tu beetaj u jelpajal bix u ch’a’ak máax xook, le betik k’éex xan bix u p’i’isil kaambal, bix u ye’sa’al ba’al wa bix u múul yantal aj ka’ansajo’ob yéetel xoknáalo’ob, le beetike’ yanchaj u mu’uk’ankúunsa’al síikolojiikóo áantaj ku ts’a’abal ti’ xoknáalo’ob, tumen ma’ táan u tse’elel mix bik’in.
Le beetike’, ts’o’ok jump’éel ja’ab yéetel uláak’ táan chúumuk káajak u beeta’al jump’éel nu’ukbesaj tumen Siies ti’al u yáantik xoknáalo’ob, tumen ba’ax úuch yóok’lal pak’be’en k’oja’ane’ ya’abach máax yajluub u yóol yéetel máax chi’ichnajij, ts’o’okole’ ojéela’an tu péetlu’umil Yucatáne’ ya’abach máak ku kíinsikubáaj tu yóok’lal.
Nu’ukbesaje’ ts’o’ok u káajsik u ka’a jaatsil; láayli’ ku yáanta’al aj ka’ansajo’ob, aj meyajo’ob, yuumo’ob, sikoologóos yéetel uláak’ máako’ob, ikil u beeta’al tsikbalo’ob yéetel kaambalo’ob.
“Ku láak’inta’al máak tumen máaxo’ob jach kaambanaja’ano’ob ti’al u mu’uk’akúunsa’al tuukul”, tu ya’alaj.
Xak'alutskíinsa'an tumen: Sasil Sánchez Chan
