X áaktibiistáa Olimpia Coral Melo Cruz ku tukultike’ yaan kex 900 u p’éel kúuchil tu’ux ku ko’onol máak ti’al u beetik sexual meyajo’ob ti’ Internet tu petenil Yucatán, le beetik ku ya’alike’ ma’ unaj chéen u k’e’e’xel a’amajt’aanili’, unaj xa u k’e’exel ba’al tu moots u tuukul wíinik.
A’almajt’aan ts’a’ab u k’aaba’ je’el bix leti’o’, ku kaxtik ma’ u loobilta’al ko’olel ti’ Internet; jo’oljeak 11 ti’ octubree’ tu xíimbaltaj u kaajil Jo’, ka’aj bin tu kúuchil Congreso del Estado de Yucatán, tu’ux tu beetaj k’a’aytajil tsikbal ti’al u líik’sik u t’aan, ikil tu k’áataj ka ch’éenek u sexual ko’onol máak ti’ Internet, ts’o’okole’ unaj xan u ka’ansal máak ti’al ma’ u yúuchul loobilaj je’el bix le je’ela’, le beetike’ yanchaj múuch’tambal ichil aj pat a’almajt’aano’ob yéetel u jeel áaktibiistaob.
También te puede interesar: Península de Yucatán, víctima de mercados de explotación sexual en línea
Ku ya’alike’ u wíinkilal ko’olelo’obe’ láayli’ u ma’anal chéen beey sexual ba’al, ts’o’okole’ najmal u k’e’exel bix u pakta’alo’ob: ti’ leti’obe’ yaan u páajtalilo’obi’. “Táan u binetik k’eexilo’ob ti’ a’almajt’aan,b a’ale’ beyxan ka k’éexek u tuukul máak, ti’al u ch’éenel u yila’al ko’olel chéen beey nu’ukule’”.
Tu tsikbaltaje’, u petenil Yucatáne’ lu’um tu’ux jach ya’ab u ko’onol máak ti’al sexual meyaj. Te’e kúuchilo’ob koonole’, ku tsikbaltik, ku na’aksa’al yéetel ku k’i’itbesa’al u jejeláasil ba’al kex ma’ cha’aban tumen u yuumili’, tumen tak chéen yóok’ol bej yaan ko’olel kéen ch’a’abak u yoocheli’, ts’o’okole’ ku na’aksalo’ob ti’ reedes sosyaales, je’el bix Facebook, tu jaatsil Marketplace wa ti’ uláak’ kúuchilo’ob.
Ti’al túun u ch’éenel le talamilo’oba’, ku ya’alik k’a’anan u jáawal u beeta’al ba’al je’el bix tak walkila’, ba’ale’ beyxan u k’e’exel xan u áalgoriitmoilo’ob reedes ti’al u ch’éenel u ye’esa’alo’obi’. “Walkila’, ojéela’an yaan díijital loobilaj, ba’ale’ láayli’ xan p’aatal 180 u p’éel tak pool beeta’an tu táan Fiscalía del Estado de Yucatán ma’ ts’aatanta’ako’obi’.
Kex tumen tu lu’umil Yucatáne’ séeba’an úuchik u éejenta’al Ley Olimpiae’, ma’ k’a’abéetkunsa’an je’el bix unaje’.
Xak'alutskíinsa'an tumen: Sasil Sánchez Chan
