de

del

Bíin yanak maanal 2 mil u aj meyajilo’ob Pemex tu kaajil Ciudad del Carmen, ti’al 2022

En enero de 2022 llegarán 2 mil 500 trabajadores de Pemex a 'Carmen'
Foto: Reuters

Ti’al u winalil enero ti’al u ja’abil 2022e’ yaan u káajal u k’éexel kex 2 mil 500 u túul u áadministratiiboil aj meyajo’ob Petróleos Mexicanos (Pemex) ti’al u kóojoloo’ob Isla, tumen beey k’a’ayta’ab kun beetbil tumen u jala’achil México, Andrés Manuel López Obrador, ti’al u ts’áak tu kaajil Carmen u noj kúuchilo’ob petroleos, beey tu ya’alaj u jo’olpóopil le kaajo’ Pablo Gutiérrez Lazarus.

Ich k’áat chi’ tsikbal tu beetaj ka’aj ts’o’ok u ts’a’abal k’ajóoltbil Bazar Cultural táan u beeta’al kalikil táan Congreso Shallow and Deepwater Méxicoe’, tu ya’alaje’ u x jala’achil le péetlu’umo’, Layda Elena Sansores San Román, yéetel máax jo’olbesik Pemex, Octavio Romero Oropeza, ti’al u je’ets’el u kúuchilo’ob meyaj mola’ay te’e kaaja’.

“Ti’al eneroe’, yaan u máansa’al Pemex, yéetel u ya’abil u aj meyajnáailo’obe’, tak tu kúuchil 25, máax unaj k ts’aatáantik je’el bix unaje’, le beetike’ najmal xan u no’ojan beeta’al meyajo’ob, je’el bix u k’a’amal aj xíinximbal máak, u kaláanta’al kaaj, kaambal, ichil uláak’ ba’alo’ob”.

Tu ya’alaje’, ts’o’ok u yojéeltiko’obe’ yaan u yantal kex 2 mil 500 u túul máak kéen k’uchuk te’e peteno’, u ya’abile’ leti’e’ máaxo’ob ku meyaj tu áadministrasyonil Dirección General de Pemex.

 

También te puede interesar: En enero de 2022 llegarán 2 mil 500 trabajadores de Pemex a 'Carmen'

 

Gutiérrez Lazaruse’ tu ya’alaj ti’ jejeláas múuch’tambalo’ob ts’o’ok u beeta’al yéetel u jala’achil le lu’umo’, ts’o’ok u yila’al u páajtalil u ma’alo’obkúunsa’al yéetel u táakmuk’ta’an ma’ax yaan ti’al u k’a’amal aj xíinximbal máak, je’el bix péepen k’áak’.

“K’a’abéet k múul meyaj ti’al u káajal u ka’a yantal ba’al ti’al u k’uchul máak te’e lu’uma’, ti’al u yantal uláak’ páajtalil ti’ máax ku taal yóok’lal meyaj, ba’ale’ beyxan ti’al xíinximbal”.

Tu ya’alaje’, Isla del Carmene’ k’ajóolta’an óoli’ beey chéen ti’al meyaj, ba’ale’, unaj u yila’al kaaj tu’ux ku páajtal u je’elel máak yéetel ti’al u xíimbalta’al, “tumen ya’ab ba’al je’el u páajtal u beeta’al te’e kaaja’”.  

“Le beetike’, te’e Ayuntamientoa’ yaan k táakmuk’tik le ba’ax k’ajóolta’an beey  Coordinación Municipal de Turismo, ti’al u súutul Dirección, tumen beyo’ yaan u k’a’ananchajal je’el bix unaje’, ti’al u kaxta’al u chíimpolta’al beey Pueblo Mágico, u kaajil Isla Aguada”. 

Xak'alutskíinsa'an tumen: Sasil Sánchez Chan