Tu jo’oloj ka’ap’éel ja’ab k’áata’ak tumen j k’iin Papa Francisco ma’ u cha’abal ti’ mix juntúul j k’iin ka u beet ba’ax ma’ unaj yéetel paalale’, U Diócesil Kaanpeche’ tu jets’aj yaan wakp’éel tak poolo’ob beeta’an yóok’ol j k’iino’ob yaan te’e péetlu’umilo’, tumen tu beetajo’ob u yóol paalal yéetel ko’olel ku táakpajal te’e najil k’ujo’obo’, úuchik u k’a’abéetkunsiko’ob ba’ax ku meyajtiko’ob ti’al u beetiko’ob k’aas.
Beyxan tu ya’alaje’, ts’o’ok u je’ets’el u nu’ukil ba’ax k’a’abéet u beeta’al kéen úuchik ba’al beya’, le beetik Diócesile’ ku jets’ik wa yaan ba’ax unaj u táakbesa’al ti’ u tsoolju’unil xaak’al, yéetel Obispadoe’ leti’ jets’ik beyka’aj k’iin unaj u tse’elel ti’ ba’ax ku beetik te’e najil k’ujo’, ts’o’okole’ ku jets’iko’ob ba’ax ma’ unaj u beetiko’ob ti’al ma’ u k’askúuntiko’ob xaak’al ku beeta’al, ti’al beyo’ u beetiko’ob ba’ax jets’a’an tumen le najil k’ujo’ yéetel xan tumen jo’olpóopo’ob.
También te puede interesar: Diócesis de Campeche confirma seis denuncias contra sacerdotes
Máax beetik u k’a’aytajil Diócesis, Gerardo Casillas González, tu ya’alaje’, óoxtúul j k’iino’ob yanchaj u jóok’sa’alo’ob ti’ najil k’uj tu ja’abil 2019, úuchik u je’ets’el tumen Vaticanoe’ ma’ u kaláanta’al máax kéen u beet ba’ax ma’ patali’, yóok’ol máaxo’ob ku bin te’e najilo’ob k’ij, tumen unaj u ts’a’abal u si’ipilo’ob, beyxan u tse’elelo’ob ti’ noj t’aan k’uba’an ti’ob te’e najil k’ujo’.
Ka’atúul ti’ le j k’iin taka’ab u poole’, táan u p’iis óolta’alo’ob, ts’o’okole’ yaan u tse’elelo’ob ti’ u noj t’aanil k’uba’an ti’ob ichil najil k’uj wa tumen ka je’ets’ek leti’ob beet wa ba’ax k’aasili’, ba’ale’ wa ma’ táan je’ets’el u si’ipilo’obe’, ma’ xan a’alab ba’ax ku beeta’al yóok’lalo’obi’; beyxan ma’ ojéela’an uláak’ ba’ax úuch yéetel uláak’ juntúul j k’iin taka’ab u pool; ma’ xan táan u páajtal u ya’alal u k’aaba’ ti’ mix juntúuli’, mix xan tu’ux yano’obi’, ti’al ma’ u k’atkúunsa’al u beel xaak’al ku beeta’al.
Beyxan, tu ya’alaje’ je’el ba’axak loobilaj wa k’aasil ka k’uchuk beetbil tumen j k’iino’ob, yóok’ol paalal wa ti’ máax ma’ chuka’an u muuk’ ti’al u tokikubáaj ti’ je’el ba’axak k’aasile’, yaan u yantal u ts’a’abal u si’ipil je’el bixake’, le beetike’, tu ya’alaje’, U Diócesii Kaanpeche’ yaan u yáantik jo’olpóopoo’ob ti’ je’el ba’axak ka k’a’abéetchajak ti’ ti’al u yila’al ma’ u yúuchil le loobilajo’oba’, ti’al ma’ u beeta’al k’aas ti’ mix máak.
Xak'alutskíinsa'an tumen: Sasil Sánchez Chan
