de

del

Tu yáax k’iinil diciembree’ yaan u káajsa’al u yáax jaatsil meyaj ti’al u nu’up’ul péepen k’áak’ ku yáalkab tu noojol-lak’inil México yéetel u lu’umil Guatemala beyxan Honduras; kéen ts’o’okoke’ yaan u yila’al u táakbesa’al xan El Salvador yéetel Belice. Tuláakal le je’ela’ táaka’an ichil u meyajil Mundo Maya, beey úuchik u k’a’aytik máax beetik u séekretaryoil Turismo tu lu’umil México, Miguel Torruco, úuchik u ch’a’achibtik u k’a’ananil u núup’ul le ka’ap’éel noj lu’umo’oba’.

“Mantats’ u tsikbalta’al ba’al yóok’lal maaya kaajo’ob, ba’ale’ ma’ nup’a’ano’obi’, ba’ale’ walkila’ ts’o’ok u káajal u tsikbalta’al maaya bej ti’al u páajtal u nup’a’alo’ob, wa ma’ táan u beeta’ale’ ma’ xan táan u béeytal u mu’uk’anchajal u ka’a’amal aj xíinximbal máako’obi’, ba’ale’ walkila’ nika’aj k’ex le je’ela’”, tu ya’alaj j séekretaryo, máax tu ya’alaj ba’ax táan u beeta’ale’, óoli’ je’el bix úuchben sak bejo’ob yanchajij, ba’ale’ beora’ ka’an kun beetbil. Le bejo’oba’ yaan u meyajta’al tumen u mola’ayil Aeromar.

 

También te puede interesar: Incentivan conectividad aérea entre los países del Mundo Maya

 

Ichil Mundo Mayae’ táaka’an México, Belice, Honduras, Guatemala yéetel El Salvador. Le je’ela’ jump’éel meyaj ti’al u nu’up’ul jejeláas noj lu’umo’ob, tu’ux xan ku múuch’ul miatsil, le beetike’ k’a’anan u túumbenkúunsa’al ba’ax yaan ti’al u xíimbalta’alo’ob, ti’al beyo’ u páajtal u k’uchul uláak’ máak te’e kaajo’obo’.

Noj lu’umo’ob táakbesa’an te’e noj meyaja’, unaj u kaláantiko’ob yéetel u ts’aatáantiko’ob le úuchben kaajo’ob yaan te’elo’, tumen ku beetik u yantal uláak’ ba’al ti’al k’ajóoltbil, tu tsikbaltaj Miguel Torruco.

Ichil ba’ax ku páajtal u cha’anta’al te’e Mundo Mayao’, j meyaje’ tu ya’alaj ti’ yaan u nojoch ch’ooj joolil Belice; Joya de Cerén, tu lu’umil El Salvador; Reserva de la Biósfera del Río Plátano, tu lu’umil Honduras; Tikal, tu lu’umil Guatemala wa Cañón del Sumidero tu lu’umil Chiapas, México.

Xak'alutskíinsa'an tumen: Sasil Sánchez Chan