Ichil ba’ax ojéela’an tumen Sistema Municipal de Agua Potable y Alcantarillado de Campeche (Smapac), ila’abe’, tu méek’tankaajil Kaanpeche’ u 48 por siientoil kaaje’ yaan u p’áax wa xanchaja’an ti’ bo’ol unaj u beetik, le beetike’ máax jo’olbesik le mola’ayo’, Juan Carlos Lavalle Pinzón, tu k’áataj ti’ kajnáalo’obe’ ka yanak u bo’otiko’ob ba’al je’el bix unaje’, ti’al beyo’ u páajtal u yutsil meyaj ba’al u ti’alo’ob.
Kex tumen tu ya’alaje’ mina’an tu’ux táan u xo’ot’ol ja’ tu beele’, tu k’áataj ti’ máaxo’ob láayli’ u p’axmajo’ob wa ba’axe’, ka náats’ako’ob tsikbal yéetel u juriidikoil le mola’ayo’, ti’al u mokt’antiko’ob bix je’el u páajtal u beetiko’ob u bo’olo’ob, tumen walkila’ ku yéensa’al u 30 por siientoil wa tumen ku bo’ota’al tuláakal le ja’aba’, tak octubre ti’ u ja’abil 2022; 20 por siientoi wa ka bo’toa’aj tak noviembre yéetel 10 por siiento wa tak diciembre, ba’ale’ beyxan a’alabe’ yaan u yéensa’al xan u tojol ti’ rekaargóos.
También te puede interesar: 48 por ciento de la población campechana no paga el servicio de agua potable
Beyxan tu ya’alaje’ yaan u yila’al wa ku páajtal u ja’atsa’al u bo’olil, ti’al u yantal tak ichil ka’ap’éel wa óoxp’éel kíinsenáa, wa le bix kun béeytale’, ti’al u ma’ u yantal u xo’ot’ol ja’ ti’ mix máak.
Tu k’a’ajsaj xane’, Smapace’ jump’éel mola’ay ma’ jach taak’al yanik ti’ Ayuntamiento de Campeche, le beetike’ k’a’abéet u yáantajil kajnáalo’ob ti’al u páajtal u meyaj je’el bix unaje’: u yutskíinsik wa yaan tu’ux ku wéekel ja’, u ts’a’abal uláak’ tu’ux u ch’a’abal ja’ ti’ túumben najo’ob, je’el xan u kaláantik ma’ u k’astal u boombail tu’ux ki jóok’sa’al ja’ yéetel u no’oja’an k’ujsa’al ja’ tuláakal tu’ux ich kaaj.
“K yaj óoltik ma’ táan u yantal riifáa te’e ja’aba’, k ojel jump’éel ba’al ku kóolik kajnáalo’ob, ba’ale’ k tukultik xane’, k’a’anan u yantal u yóol máak u beetik ba’ax unaj u beetik, ts’o’okole’ yéetel deskuentos ts’o’ok u ts’a’abale’ je’el xan u yantal u yóol u beetik ba’ax k’a’abéet”, tu ya’alaj.
Xak'alutskíinsa'an tumen: Sasil Sánchez Chan
