Le miércoles máanika’ káaj u meyaj u kúuchil Centros de Conciliación Laboral tu péetlu’umil Quintana Roo, ti’al u p’áatal tu jeel Juntas de Conciliación y Arbitraje. Le ba’ax táan u beeta’ala’, táan xan u beeta’al Aguascalientes, Baja California, Colima, Guanajuato, Morelos, Oaxaca, Puebla, Querétaro, Tlaxcala, Veracruz, Baja California Sur yéetel Guerrero.
Ti’ le kúuchilo’oba’ yaan u yantal óoxp’éel u najilo’obi’; jump’éele’ Chetumal, tu méek’tankaajil Othón P. Blanco, yóok’ol u noj bejil 5 de Mayo número 19, tu ti’itsil Carmen Ochoa de Merino; Playa del Carmen, tu méek’tankaajil Solidaridad yóok’ol u bejil Tecnológico lote 003, manzana 006, supermanzana 75, región 30; yéetel Cancún, tu méek’tankaajil Benito Juárez yóok’ol u noj bejil Cobá, manzana 13, supermanzana 22 niveles 2, 3 yéetel 4.
También te puede interesar: Entran en funciones los Centros de Conciliación Laboral de QRoo
U tuukulil le kúuchilo’oba’, leti’e’ u béeytal u séebkunsa’al, u béeytal yéetel ma’ u talamtal ti’al u k’uchul máaki’. Ku kaxtik u ts’aatáantik je’el ba’axak talamil ka k’uchuk yantal ichil aj meyajo’ob yéetel páatrono’ob, tu’ux ka no’oja’an k’a’abéetkunsa’ak a’alamajt’aan ma’ili’ yanak u beeta’al juisyóoi’.
Jach k’a’ana u ya’alale’, yéetel u túumben justiisyail meyaje’, yaan u páajtal u xu’ulsa’al talamilo’ob yéetel jela’an tuukulo’ob ka k’uchuk yantal, ikil u kaxta’al ka yanak utsil mokt’aan te’e ku’uchilo’oba’, jach u xanile’ tak ichil 45 k’iino’ob.
U mola’ayil Secretaría del Trabajo y Previsión Social ti’ le péetlu’umo’ tu ya’alajae’, ikil táan u je’ebel Centro de Conciliación Laboral yanchaj uláak’ 220 uláak’ meyajo’ob, yéetel j ts’a’ab ti’ máax tu táakbesajubáajo’ob ti’ keet je’ek’abta’ab ti’al kaaj yéetel uláak’o’ob ma’ ti’al tuláakalo’obi’, ti’al u kéet yantal páajtalil ti’ máak.
“Meyaj jo’olbesa’an tumen jala’ach Carlos Joaquíne’, táan u beetik tuláakal ba’ax tu jets’aj yaan u meyajtike’, ti’al u kéet yantal páajtalilo’ob ti’ tuláakal aj meyaj máako’ob, ti’al beyo’ u yantal ti’ob ba’ax k’a’abéet ti’ob, tu’ux ka úuchuk meyaj ich sáasil óol yéetel tu beel”, beey jets’a’abik tumen le mola’ayo’.
Xak'alutskíinsa'an tumen: Sasil Sánchez Chan
