Máax jo’olbesik u mola’ayil Secretaría de Fomento Económico y Trabajo (Sefoet), Ernesto Herrera Novelo, tu ya’alaje’ ts’o’ok u béeykunsa’al 109.10 por siientoil le meyajo’ob ch’éen u yantal úuchik u káajal u k’oja’anil Covid-19.
Yóok’lal nu’ukbesajo’ob ts’o’ok u beeta’al tumen u jala’achi le péetlu’uma’, yéetel tumen ts’o’ok u yantal múul meyaj yéetel mola’ayob je’el bix Nacional financiera (Nafin) yéetel Banco Nacional de Comercio Exterior(Bancomext), Yucatáne’ leti’e’ yáax lu’umil tu’ux ts’o’ok u ka’a beeta’al u suut taak’in yéetel ts’o’ok u yantal tuka’atéen meyajo’ob, ts’o’okole’ leti’e’ lu’um tu’ux yaaj u jach p’íit xookil máax mina’an meyaj, beey chíikpaj ti’ xookil beeta’ab tumen Encuesta Nacional de Ocupación y Empleo(ENOE) yéetel tumen Instituto Nacional de Estadística y Geografía (Inegi).
También te puede interesar: Yucatán recuperó todos los empleos perdidos durante la pandemia: Sefoet
Herrera Noveloe’ tsikbalnaj tu súutukil úuchik u káajal u cha’anil Feria de Crédito NAFIN-SEFOET-CANACO SERVYTUR Mérida. Te’elo’, tu ya’alaje’, lik’ul u ja’abil 2019e’, u mola’ayil Sefoete’ ts’o’ok u ts’áak 197 u p’éel kreeditos, tu’ux k’a’abéetkunsa’ab 6 miyoonesil 224 mil pesos ti’al ko’olel máax yaan u mola’ayob, beyxan yóok’lal u nu’ukbesajil Microyuce’ ts’o’ok u ts’a’abal 334 u p’éel kreeditos tu’ux k’a’abéetkunsa’an 38 miyoonesil 954 mil pesos.
Ti’al u ja’abil 2020e’, maanal 271 por siientoil k’uba’ab ti’ máaxo’ob yaan u mola’ayo’ob, yéetel maanal 320 por siientoil kreeditos k’uba’ab ti’ ko’olel yaan u mola’ayo’ob, keetel yéetel le beyka’aj ts’a’ab tu ja’abil 2019. “Ko’olele’ ts’o’ok u ye’esik asab chuka’an u yóol ti’ xiib”, tu ya’alaj.
Beyxan, tu ya’alaje’, yóok’lal u nu’ukbesajil Impulso Yucatán tu múul meyajtaj yéetel Nafine’, ts’o’ok u ts’a’abal 635 u p’éel kreeditos, tu’ux k’a’abéetkunsa’an mil 154 miyoonesil pesos, ti’al u yutsil máax yaan mola’ayo’ob.
Xak'alutskíinsa'an tumen: Sasil Sánchez Chan
