Ti’ k kaajalo’obe’ yaan xan táankelemo’ob tu kanaj u beeto’ob deportée, máaxo’ob uts tu yich keetil báaxal, ba’ale’ ti’ mejen kaajo’obe’ ma’ jach táan u yantal u páajtalil u beeta’ali’, beey tu ya’alaj Arturo Couoh May, u kajnáalil Betania, tu méek’tankaajil Felipe Carrillo Puerto. Leti’e’ táakpaj ti’ keetilo’ob beeta’ab te’e k’iino’oba’, ti’al u jóok’sa’al máax kun chíikbesik u péetlu’umil Quintana Roo ich Encuentro Nacional Deportivo Indígena 2021 yaan u beeta’al Oaxaca ti’al u ts’ookbal le winala’.
Couoh Maye’ 23 u ja’abil. Ku báaxal beey u méediokampistail fuutbol 7. Ku kaambal ti’ Daniel Sabido Díaz, máax p’ata’an meyaj tu múuch’báaxalil Felipe Carrillo Puerto; leti’ tu ya’alaje’ le je’elo’oba’ leti’e’ yáax keetil tu’ux táan u táakpajalo’ob úuchik u máan pak’be’en k’oja’an, le beetike’ aj báaxalo’obe’ jach ki’imak u yóolo’ob.
“Le keetilo’oba’ jach chéen u ti’al máasewal kaajo’ob, ku k’áatal ti’obe’ tsaaj siijilo’ob ti’ maaya kaajo’ob, ba’ale’ beyxan ka u t’ano’ob u t’aanilo’obi’. Páayt’anta’abon, ts’o’okole’ táan k táakpajal tumen yaan to’on tuláakal ba’ax ku k’áatiko’ob, le je’ela’ táan u múul beeta’al yéetel Comisión para la Juventud y el Deporte (Cojudeq) ts’o’okole’ táan u beeta’al ichil tuláakal u noj lu’umil México”, tu tsolaj Sabido Díaz.
También te puede interesar: En las comunidades también hay atletas: Arturo Couoh May
Máaxo’ob ku táakpajale’ unaj yaan u ja’abil ichil 18 tak 23. Ts’o’okole’ Daniel Sabido tu ya’alaje’ táan u kaxta’al u ts’a’abal túumben pájatalil ti’ táankelemo’ob, ti’al u jóok’ol tu kaajalo’ob, “ti’al u ye’esal ti’ maaya kaajo’obe’ yaan xan máaxo’ob u jach ojelo’ob báaxal”.
Ti’ keetilo’ob beeta’al le sábado máanik ti’ u kaajil Puerto Morelose’, báaxalnaj u múuch’ilo’ob báaxal Tulum, Carrillo Puerto yéetel máax ulabto’ob; báaxta’ab áatletismo, basketbol, fuutbol 7 yéetel bóoleibol, ichil u jaatsil xiib yéetel ko’olel. Beyxan yaan máax kéen u báaxto’ob p’urhepecha booláa, láayli’ ti’ le ka’a jaatso’obo’, tu’ux yaan u táakpajal Asociación Estatal de los Juegos y Deportes Autóctonos y Tradicionales de Quintana Roo.
Encuentro Nacional Deportivo Indígena 2021 tukulta’an u beeta’al tu péetlu’umil Oaxaca, ichil u k’iinil 24 tak 28 ti’ le winalil noviembre yano’ona’. Ti’ u kajnáalilo’ob Puerto Morelose’ yanchaj óoxp’éel ti’ le kamp’éel kúuchilo’ob jóok’sa’an u ti’al bini’, ichil u báaxalil bóoleibol ti’al xiib yéetel ko’olel, beyxan ichil fuutbol 7 ti’al xiib, ka’alikil ko’olel tu náajaltaj u bino’obe’ siijilo’ob Tulum.
Xak'alutskíinsa'an tumen: Sasil Sánchez Chan
