de

del

Máaxo’ob ku meyaj yóok’lal aj xíinximbalo’ob QRooe’ tu k’áato’ob ma’ u péektsila’al droogáas ti’ máaki’

Piden a prestadores de servicios de QRoo no promover consumo de drogas entre turistas
Foto: Notimex

“K páayt’antik tuláakal máax ku meyaj ti’al u k’a’amal aj xíiximbal máako’obe’, ma’ u péektsilta’al, mix jump’íite’, u k’a’abéetkunsa’al droogáas, mix xan ka’a páayt’anta’ak máak ti’al u beeta’al ba’ax ma’ unaji’, beyxan ka ta’akak u pool je’el máaxak ka u máan u kon le ba’alo’oba’”, beey a’alab tumen u éempresaryoilo’ob Quintana Roo ti’ jump’éel k’a’aytajil ts’íib tu múul beetajo’ob. Beyxan tu k’áatajo’ob ti’ u kóonsuladoil le jejeláas lu’umo’obe’ ka yanak u túuxto’ob t’aan ti’ u yéet lu’umilo’obe’ ti’al u ts’a’abal u yojéelto’obe’ u máansa’al droogáas tu lu’umil Méxicoe’ ts’a’aban u kuuch yéetel u si’ipil, “ts’o’okole’ táan k kaxtik jach utschajak tu yicho’ob xíimbalil kéen u beeto’ob wey lu’ume’, chéen ba’ale’ ma’ xan ti’al k ch’ichnaktal to’oni’”.

 

También te puede interesar: Piden a prestadores de servicios de QRoo no promover consumo de drogas entre turistas

 

Consejos Coordinadores Empresariales tu le péetlu’umo’, (Cancún, Riviera Maya, Chetumal yéetel Cozumele’) tu ts’áajo’ob k’ajóoltbil ju’un tu’ux tu k’áatóoltajo’obe’ ka ya’abkunsa’ak kanan ku beeta’al ti’ tuláakal le kaajo’obo’: “le ba’alo’ob ku yúuchul te’e k’iino’oba’ ts’o’ok u beetik u yantal saajkil ti’al u kóojol máak weye’, ts’o’okole’ yan óol u yúuchul, ba’ale’ k ojel le loobilaj ku beeta’alo’, ku yúuchul tumen táan u ch’a’ak bej tuka’atéen”. 

Tu ya’alajo’obe’, jo’olpóopo’obe’ táan u meyajo’ob ti’al u xu’ulsiko’ob k’aasil ba’al ku yúuchuli’, ts’o’okole’ tu ya’alajo’obe’, je’el xan u ts’áak u yóolo’ob ti’al u béeytal. Beyxan tu k’áatajo’ob ti’ u yóox jaats meyajil jala’ache’, ka no’ojan kaláanta’ak Riviera Maya, yéetel le uláak’ bulukp’éel u méek’tankaajilo’ob Quintana Roo. 

“Táan k k’áatik ti’ kaaje’, ka u beet u tak poolil je’el ba’axak ka u yil jela’ane’, ti’al u t’aan 911 wa 089, tumen k’a’anan u beeta’al ti’al ma’ u yantal sajbe’entsil mix tu’ux; beyxan k k’áatike’ ka jach tsikbalnak máak yéetel u yéet kajalo’obe’, ti’al u paklan kaláantikubáaj máak”, a’ala’ab te’e ts’íibo’.

 

Jela’an tuukulo’ob ichil otelero’ob yéetel u jala’achil le lu’umo’  

Uláak’ ba’ale’, u múuch’kabil Asociación de Hoteles de Cancún, Puerto Morelos yéetel Isla Mujerese’, tu jóok’saj jump’éel ts’íib tu’ux tu ya’alaje’ u yokol taak’in yéetel u k’uchul aj xíinximbalo’obe’ “chéen ti’ jump’éel chan k’áan t’iinil” yóok’lal ba’ax úuch ti’ jump’éel otel yaan Puerto Morelos; yóok’lale’, jala’ach Carlos Joaquíne’ tu ya’alaje’, jak’a’an u yóol yóok’lal ts’íib j ts’a’ab k’ajóoltbil.

Xak'alutskíinsa'an tumen: Sasil Sánchez Chan