K'iintsil / Jairo Magaña
U meyajta’al Tren Mayae’ ku chíikbesik tak óoxtéen le beyka’aj taak’in suuk u ts’a’abal ja’ab man ja’ab ti’al u yúuchul meyaj te’e xaman-lak’ina’, tumen ku píitmáan ti’ 40 mil miyoonesil pesos te’e lu’uma’, chéen ti’al u Jaatsil 3, ts’o’okole’ le je’ela’ jump’éel ba’al k’a’anan ti’al le baantaa’ tumen ti’ le uláak’ ja’abo’obe’, tres mil miyoonesil pesos yanchaji; ka’alikil yóok’lal u meyajil tu Jaatsil 4 Izamal-Cancún, táan u beeta’al tumen u mola’ayil ICA, taak’ine’ ku chukik kex 30 mil miyoonesil pesos, tu ya’alaj u meyjnáalil Tren Maya tu péetlu’umil Yucatán, Aarón Rosado.
También te puede interesar: Tren Maya representa 13 veces más inversión anual en el sureste
Fondo Nacional de Fomento al Turismo (Fonatur) tu lu’umil Yucatáne’ ts’o’ok u káajsik Tercera Jornada de Proveedores del Tren Maya ti’al u meyajil u Jaatsil 2 Calkiní-Izamal, táan u beeta’al tumen u mola’ayil Azvindi Ferroviario, máax yéetel táan u múul ts’aatáanta’al ka beeta’ak tuláakal ba’ax je’el bix unaje’.
Ka’alikil láak’inta’an tumen máax chíikbesik Consejo Coordinador Empresarial (CCE), Rocío del Mar Rosas Aguiar, tu ya’alaj Yucatáne’ yaan u yuumil yéetel u páajtalil u beeta’al noj meyaj je’el bix lela’, le beetik walkila’ táan u yila’al bix u nup’a’al uláak’ mola’ayob.
“Walkila’ táan k t’aan yóok’al ferreaa nu’ukulo’ob, ba’ale’ yaan ba’alo’ob ku jóok’ol tu bak’pachil, le beetik yaan u k’a’abéetkunsa’al uláak’ meyajo’ob”, tu ya’alaj Rosado Castillo.
Turismo Kaanpeche’ ku ya’alik ma’alob ka beeta’ak uláak’ u kúuchil e’esajil
Ikil ts’o’ok u kaxta’al maanal 17 mil úuchben nu’ukulo’ob ka’alikil táan u beeta’al u meyajilo’ob Tren Mayae’, máax jo’obesik Secretaría de Turismo de Campeche (Sectur), Mauricio Arceo Piña, tu ya’alaj ti’ Fonature’, ma’alob ka beeta’ak u yóoxp’éelil kúuchil e’esajil tu kaajil Candelaria, ti’al u jach chíikbesa’al ba’ax le ts’o’ok u seen kaxta’al te’e baantao’.
Jayp’éel k’iino’ob paachile’, Diego Prieto Hernández, máax jo’olbesik Instituto Nacional de Antropología e Historia (INAH), tu ya’alaje’ yaan u tuukulil u beeta’al ka’ap’éel kúuchil e’esajil, jump’éele’ Chichén Itzá, Yucatán, yéetel uláak’e’ tu bejil Pu’uk.
Xak'alutskíinsa'an tumen: Sasil Sánchez Chan
