de

del

Beeta’ab u múuch’tambalil mayiistaob; chíimpolta’ab k’aay tuukul yéetel paax

Con homenaje a la poesía y música maya, realizan encuentro de mayistas en Playa del Carmen
Foto: Rosario Ruiz

Maaya paaxe’ u’uya’ab ka’alikil beeta’ab u jejeláasil e’esajilo’ob ichil II Encuentro Internacional de Mayistas beeta’ab tu méek’tankaajil Playa del Carmen, te’e k’iino’oba máana’, tu’ux chíimpolta’ab j xak’al xook, j paax yéetel j maaya ts’íib Martiniano Pérez Angulo. Te’e múuch’tambalo’, j ts’a’ab k’ajóoltbil túumben xaak’alo’ob beeta’an yóok’lal le úuchben miatsila’, ba’ale’ beyxan túumben meyaj beeta’an tumen u aj ts’íibilo’ob u petenil Yucatán.

“Je’el máaxake’, yaan u béeytal u k’ajóoltik xaak’aloob yéetel nojoch ba’al ku bin u yojéelta’al ti’ maaya miatsil”, beey a’alab tu súutukil úuchik u chúunsa’al le meyajo’, tumen j xak’al xook Claudio Obregón, máax tu beetaj u tse’ekil El Relato Mitológico de la Cueva Pak Ch’en.

 

También te puede interesar: Con homenaje a la poesía y música maya, realizan encuentro de mayistas en 'Playa'

 

Te’e súutuko’ múuch’ aj xak’al xooo’ob, aj ts’íibo’ob yéetel tsolnu’uk xíimbalil, tu’ux jach a’alabe’, maaya miatsile’ kuxa’an, le beetik unaj u jach chíikbesa’al, u péektsilta’al yéetel u chíimpolta’al. “Uts k ilik u beeta’al xaak’alo’ob, u yojéelta’al uláak’ ba’alo’ob yóok’lal le úuchben mayaobo’, ba’ale’ beyxan kin ts’áak u níib óolalil ikil táan u yantal u kúuchil ti’al xan u yúuchul t’aan yóok’lal u maayailo’ob le k’iino’oba’,ti’al to’on kuxa’ano’ob ich k miatsil, tumen láayli’ yaan u meyaj its’atsil k beetik”, tu ya’alaj Miriam Morales, maaya x k’aay tuukul. 

J xak’al xook Jens Rohark, ti’ u lu’umil Alemaniae’, tu tse’ektaj “El Monstruo de la Tierra de Palenque”, “Análisis arqueoastronómico y recientes estudios en el Gran Juego de Pelota de Chichén Itzá” yéetel “Las Reinas Mayas de Cobá”, ka’alikil x francesail Sophia Pincemin tu beetaj u tsikbalil “El Descubrimiento de la Tumba II de Calakmul”.

Táakpaj xan j maaya ts’íib Wildernain Villegas yéetel u’uya’ab u paax u múuch’il Túumben K´aay, taal ti’ u méek’tankaajil José María Morelos; j ts’íibk’aay Gaspar Maglah Canule’, tu tse’ektaj “Historia de Kantunilkín” yéetel x ts’íib Miriam Moralese’ tu ts’áaj k’ajóoltbil “La Mujer en la Literatura Maya y Lectura Poética”.

Ka’alikil u máan k’iine’, beey úuchik u bin u tse’ektal uláak’ ya’abach ba’al tumen aj xak’al xooko’ob. Tu ts’ook k’iinile’, tsikbalta’ab “Interpretación de la Historia de México”, tumen Samuel Cervera; “El Códice Maya de México”, tumen Jens Rohark yéetel “Los Individuos Precerámicos en Quintana Roo”, tumen éespeleologóo Jerónimo Avilés cerraron, ti’al u k’a’alal u meyajil le múuch’tambala’.

Xak'alutskíinsa'an tumen: Sasil Sánchez Chan