de

del

Foto: FGE QRoo

U mola’ayil Secretaría de la Defensa Nacional tu ts’áaj k’ajóoltbil u túumben nu’ukbesal ku tukultik u beetik ti’al u kaláantik Quintana Roo, mu’uk’ankúunsa’ab ba’ax ku beeta’al ti’al u yutsil u xaman baantail le lu’umo’; u tuukulile’, ka beeta’ak Batallón de Seguridad Turística, tu’ux ka táakbesa’ak uláak’ ah kanan kaajo’ob, beyxan u beeta’al kuarteles yéetel u ka’ansa’al aj kanan kaajo’ob táanili’ u meyajo’ob te’e péetlu’umo’.

Tu súutukil úuchik u tse’ek le miércoles máanika’, je’el bix suukile’, t’aanaj séekretaryo Luis Cresencio Sandoval González​ ka tu ya’alaje’, lik’ul u yáax k’iinil diciembree’ yaan u yantal te’e péetlu’umo’ mil 445 u túul u aj kanan kaajilo’ob Guardia Nacional, máaxo’ob yaan u máano’ob kalan tu méek’tankaajilo’ob Benito Juárez, Solidaridad yéetel Tulum.

 

También te puede interesar: Presenta Sedena nuevo modelo de seguridad para Quintana Roo

 

“Yaan u ts’aatáanta’al u kaláanta’al kaaj yéetel aj xíinximbalo’ob, je’el bix kun bin u yáalkab ja’abe’, beyxan kun bin ts’a’abal u jeel nu’ukulo’ob k’a’abéet ti’al u beeta’al le kananila’”, tu ya’alaj. U aj meyajilo’ob Guardia Nacional kun k’uchulo’obe’ jach kaambanaja’anob ti’ bix u kaláanta’al kaajo’ob suuk u xíimbalta’alo’ob, ts’o’ookole’ Quintana Rooe’ no’oja’an ti’al u beeta’al yéetel ti’al u páajtal u biinsa’al tak ti’ uláak’ kaajo’ob ti’ le noj lu’uma’. 

Uláak’ ba’ale’, leti’e’ báatayon kun beetbilo’; yaan u yantal múul meyaj yéetel u jala’achil le péetlu’umo’ ts’o’okole’ yaan u je’ets’el juntúul máax ti’al u jo’olbesik unidad de inteligencia, leti’e’ jaats meyajil tu’ux kun much’a’al ba’ax kun k’a’abéetchajal ti’al u béeytal u beeta’al wa ba’ax: “tin kun jóok’ol ba’ax unaj u yojéelta’al ti’al ka áantajnajak ti’al u tse’elel múuch’o’ob beetik k’aas te’e kaajo’”.

Beyxan yaan u yáanta’al mola’ayo’ob ti’al u biinsa’al tu táan júudisyal tuláakal ba’ax beetik u yantal loobilajil te’elo’, ts’o’okole’ yaan u ts’aatáanta’al tuláakal ba’ax unaj u beeta’al. Uláak’ ba’al ku kaxta’al u beeta’ale’, leti’e’ u mu’uk’ankúunsa’al u múuch’il máaxo’ob ku meyaj ti’al u kaxta’al ka yanak jets’eknakil, yana u p’i’isil bix kun jóok’ol meyaj te’e múuch’ila’, ti’al u yila’al ba’ax ku binetik u táakmuk’ta’al.

Tu tsikbaltaj xane’, ts’o’ok u ts’a’abal jun xóot’ k’áax, tu kaajil Tulum, ti’al “u ts’a’abal jump’éel u kúuchil Guardia Nacional”, tumen beyo’ yaan u yáantaj u chíikpajal ti’ yaan ich kaaji’.

Xak'alutskíinsa'an tumen: Sasil Sánchez Chan