X maaya chuuyo’ob ti’ u kaajil X-Pichil, tu méek’tankaajil Felipe Carrillo Puertoe’, táan u táakpaajlo’ob lik’ul bejla’a juevese’, tu múuch’tambal Encuentro de Arte Textil Mexicano, táan u beeta’al Complejo Cultural Los Pinos; beyxan táan u táakpajlo’ob ti’ tsikabal táan u beeta’al yóok’lal “u muuk’il máasewal kaajo’ob yéetel bix ts’o’ok u kaniko’ob múul meyaj”.
Meyajo’obe’ táan u beeta’al tumen u mola’ayil Secretaría de Cultura, ti’ u jala’achil u noj lu’umil México; táan u táakpajal maanal ti’ 30 u p’éel u máasewal kaajilo’ob México, máaxo’ob u jach kanmajo’ob chuuy yéetel u beeto’ob nook’. Ti’al le je’ela’, t’ana’ab u múuch’il Lool pich, ti’al u konik, u ye’esik yéetel u ka’ansik meyaj u yojel u beetej. Múuch’tambale’ káaj bejla’a 18 yéetel yaan u ts’o’okol 21 ti’ noviembre.
También te puede interesar: Artesanas mayas de X-Pichil participan en encuentro nacional de arte textil
Amanda Beatriz Tah Aranae’ leti’ máax chíikbesik múuch’il, tu’ux táakpaja’an maanal junk’aal ko’olel. Leti’e’ ku tsikbaltike’, tu winalil julio ka yáax t’ana’abo’ob tumen le mola’ayo’, ti’al u táakpajalo’ob Encuentro de Arte Textil.
“Ma’ chéen koonol yéetel e’esajil k beetik, yaan xan kaambal yóok’lal bix je’el k no’oja’an kaláantik k maarkáa, beyxan bix je’el u beeta’al u suut taak’in, yéetel bix je’el u páajtal k beetik múul meyaj ti’ k kaajal, ti’al u páajtal k beetik uláak’ meyaj k’abo’ob, ts’o’okole’ walkila’, kéen suunako’ob kaaje’ yaan u páajtal k táakmuk’tik uláak’ x meyajo’ob ti’al ma’ u je’elsik ba’ax ku beetiko’obi’”, tu tsolaj Amanda Tah.
Ichil meyajo’ob ku beeta’ale’, leti’e’ u beeta’al u xíimbalil e’esaj nook’ sáansamal. U múuch’kabil Lool piche’ yaan u táakpajal ti’ u ye’esajil “La Serpiente”, tu’ux yaan u ye’esik ka’ap’éel nook’ chíimpolta’an beey u asab ma’alobil nook’ yéetel uláak’ ka’ap’éel xok chuuy chuya’an ti’ k’ab yéetel ti’ u máakinal pedal.
Ti’al tsikbailo’ob kun beetbile’, yaan xan u táakapajl le múuch’ila’, yéetel uláak’o’ob taalja’an ti’ u péetlu’umilo’ob Puebla, Oaxaca, Chiapas yéetel tu noj lu’umil Guatemala.
Amanda Beatriz Tah tu ya’alaj xane’, táan u páa’tiko’ob u béeytal u much’ikubáajo’ob yéetel uláak’ mola’ayo’ob ti’ u lu’umil México, beyxan ti’ táanxel lu’umo’ob, ti’al u tsikbalo’ob yéetel beetiko’ob mokt’aano’ob. Je’el bix xan u náats’alo’ob yiknal Instituto Mexicano de la Propiedad Intelectual (IMPI), Secretaría de Economía (SE) yéetel uláak’o’ob.
Xak'alutskíinsa'an tumen: Sasil Sánchez Chan
