Tu jo’oloj yabach talam winalo’ob tu máansaj wíinik yóok’lal Covid-19e’, ya’abach meyajo’ob yanchaj u je’elsa’al, je’el bix le ku beeta’al ti’al u k’a’amal aj xíinximbal máako’ob. Ba’ale’ walkila’ táan u yantal uláak’ túumben péektsilo’ob je’el bix díijital aj xíinximbalo’ob, buurbujáa xíinximbal yéetel rebaancháa xíimbal.
Úuchik u káajal u meyaj máak tu yotoche’, káaj u yantal túun díijital aj xíinximbalo’ob. Jump’éel ba’ax chíikbesiko’obe’, leti’ u táanilkunsiko’ob ka yanak utsil WiFi ti’ob, beey a’alab tumen u mola’ayil Airbnb, tumen ka jo’op’ u kaxta’al tu’ux u p’áatal máake’, máayta’ab u kaxanil 288 miyoonesil u téenal.
“To’on Airbnb k ilike’ ya’abach máak káaj u meyaj tu yotoch úuchik u káajal pak’be’en k’oja’an, ba’ale’ walkila’ ku kaxtik u béeytal u meyaj je’el tu’uxak najile’”, beey tu ya’alaj Carlos Olivos, máax jo’olbesik RRPP AirBNB México, úuchik u beetik u tse’ekil “El nuevo turista, cambios psicográficos del viajero Post Covid” ka’alikil táan u beeta’al Tianguis Turístico tu noj kaajil Jo’.
También te puede interesar: Nómadas digitales y viajes de revancha, la tendencia turística
Jiménez, máax jo’olbesik koonol ich Amadeus México, tu tsikbaltaj uláak’ ba’al yóok’lal rebaancháa xíimbalil, tumen le je’elo’obo’ ku beeta’al ti’al u sutik máak tuláakal le k’iino’ob ma’ páatchaj u jóok’ol ka’alikil táan pak’be’en k’oja’an, ts’o’okole’ aj xíinximbalo’obe’ ku bo’otiko’ob uláak’ wa bajux ti’al u yantal uláak’ utsil ba’al u ti’alo’ob.
“Beey máan jump’éel ja’ab yéetel uláak’ waxakp’éel winalo’ob ts’o’okole’ ma’ jóok’eni’, yaan túun in beetik walkila’, le óoxp’éel xíimbalil p’aatal in beetej”, tu ya’alaj.
Ti’ le ba’ax táan u chíikpajal wakila’, ku tukultik yaan u yúuchul ti’ le ka’alajun winalo’ob táan u taalo’ob, ts’o’okole’ ya’abachaj xan xíimbal meyajo’ob ku beta’al.
Beey túuno’, Javier Murillo, founder, Chairman yéetel u CEOil Metrics, tu ya’alaj mix juntéen yáax k’áata’ak u k’iinilo’ob je’elil ti’ le mola’ay tu’ux ku meyajo’, je’el bix le táan u k’aáta’al ti’ le ts’ook óoxp’éel winalo’oba’, ts’o’okole’ le k’iino’ob ku k’áata’alo’ maanal jump’éel p’isk’iinil. Tuláakal le je’elo’ ku núup’ul yéetel le xíimbalilo’ob ku taal u beeta’al te’e k’iino’oba’.
Jiménez tu ya’alaje’, ti’ jump’éel xaak’al beeta’abe’, ila’ab ti’ lajuntúul máake’, bolontúul láayli’ sajak u jóok’ol xíimbal tu yóok’lal pak’be’en k’oja’an.
Xak'alutskíinsa'an tumen: Sasil Sánchez Chan
